[冰鎮鮑魚]
本身黎大排檔無諗住叫呢味餸，但見到做緊優惠，每隻只係$12，平時自己街市買都未必買到，於是就叫4隻試下。鮑魚Size都算大，餣得算入味，食落去除左醬油外，仲有少少Wasabi醬，係幾開胃的前菜。
[新南苑吊燒骨]
基本上見到每枱都必嗌的招牌菜，連骨的肉不嬲都係比較好食，食落去外脆內軟，最後仲包住蜜糖，配上肉香，仲有麻辣花生伴碟，格外惹味。
[南乳炸雞塊]
南乳雞塊估唔到份量咁多，目測有8-10舊。雞塊尤其係雞皮部份炸得香脆，而內裏的雞肉唔鞋，證明炸得唔過火。調味方面要讚一讚，有時最驚係南乳落得太重會變到超鹹，但呢度就餣得岩岩好，Keep到平衡，稍稍吊出南乳味。
[蒜蓉粉絲蒸勝瓜]
一上枱望到啲蒜蓉醬已經心心眼，勝瓜細心地厚切，食落Juicy得黎有口感，配埋蒜容醬夠惹味。不過精華部份係最底的粉絲，配上豉油同蒜蓉已經夠晒撈飯食。
整體黎講，新南苑地點方便，直接係地鐵站行2分鐘就到。價錢都算親民，仲要唔收加一，食4個餸連白飯、汽水都只係三百幾蚊。餸菜方面都有特色，唔怪之全場爆滿，好彩今日早黎先有位，下次要試下呢度的潮洲菜先。
