品香樓中西風味餐廳

營業中

休息中

都嚟食過唔少次，如果成班人食飯又唔要求環境舒服寧靜嘅，呢度其實都係唔錯選擇，可以當係有冷氣大排檔。前幾日補做朋友生日，又嚟食返餐。今次冇留手撕雞，不過問到個夥計時，佢都即刻問廚房仲有冇雞剩。雖然最後冇，不過佢肯問都經已係值得讚。通常做到咁旺嘅舖，啲人都唔會啋你，只會一句話要訂就算。不過都講返轉頭，之前食過又唔覺得係咁好食，而且啲雞肉撕到唔知去晒邊咁…黃金花枝炸得略濕，食落淋。如果多啲咸蛋黃，我會加佢分。芝士琵琶豆腐（伊麵底），可以話係我全晚最欣賞嗰味。芝士汁味道剛好。不過一定要快食，冷氣一吹就杰到成pat嘢咁。沙茶牛肉炒河個人略嫌鑊氣不足。龍鳳球我就唔知用料係蝦同雞定係乜，食落個口感好似怪怪哋咁。不過同枱各人都話好食，咁應該係我問題啫。炸豬大腸好大碟，食唔晒咁滯。腸唔太肥，炸得好香脆，送啤一流。其他餸冇乜特別，所以唔寫喇。好多人叫嘅凍朱古力，其實飲落唔濃郁，係俾多啲cream你之嘛，而且飲落好鬼甜。當晚唔知點解咁高興，左右幾枱都傾偈傾到不知幾豪情奔放。走咗一枱省港旗兵之後又嚟一枱城大生，嘈到我哋幾乎同枱都要用電話至傾到偈。