季季紅風味酒家 (已結業)

我平時好少飲茶，但父母逢星期一至六都會上茶樓，就偏偏星期日一定唔會去，因為佢哋話星期日人又多，咩優惠都取消，同平時食同一樣嘢但價錢都貴好多。所以會喺同親戚聚會先會喺星期日飲茶。之前幫襯開荃新天地嘅潮館，貪佢免茶免加一。但最近潮館關門大吉，於是轉場第一次去季季紅，其中一個好處係可以訂位。星期日午市，客人約八成滿，walk in都應該唔使等位。我哋坐樓上，有大玻璃，採光好好幾開陽，望到玄圓學院嘅翠綠山頭。地方都幾闊落。小點14.8，中點18.8，比閒日貴一兩蚊，尚算合理，粉麵嗰啲就比平日貴十蚊，四五十左右。小點嘅選擇都有唔少，棉花雞、粉果等等。點心質素合格，係炸物油咗少少。最驚喜係蒸飯，當以為係一般盅頭飯，但原來用大大個蒸籠上，蒸籠底鋪有荷葉，飯面上滿滿嘅餸，賣相好吸引。豉椒汁好濃味，好有誠意。平均每人60食到飽一飽，假日價算好抵。