大班樓 (已搬遷) 新店位置

今日又去咗上環大班樓食飯，佢哋而家就好出名呀，成為亞洲第一嘅餐廳，所以就好難book位，晚餐都要6:00先有位。今日得兩個人，所以都係叫咗佢哋嘅二人餐 ，雖然食過，但係都想食多一次。前菜韭菜蟹肉盒，酥脆盒裏面材料處理得非常細緻，食得出刀工，味道調校配合好好。芋泥煙鴨盒，煙熏味啱啱好，芋泥夠香又夠滑，外皮的蜂巢非常鬆軟。雞油花雕蒸大蟹，雞油非常香，花雕夠濃，陳村粉吸收晒所有鮮味，完全冇得頂，花蟹又夠新鮮，肉十分甜。話梅肉桂糖醋排骨，個人覺得話梅味可以再濃少少，肉桂加脆脆配搭十分新鮮，一字排整件上枱，所以外皮有點過熟及乾。之後嘅三蝦炒飯，飯都幾好乾身又香口。最後上啲杞子雪糕，奶味太重，雪糕如果本身有杞子泥混合可能好一點。杏仁茶夠香夠滑，上堂非常夠熱。大班樓水準始終控制得好好，味道多年不變，食得出有心思的中菜館。