皇軒私房菜 (裝修中)

朋友生日搵間舒適嘅食府，呢間私房菜雖然唔大，但入面格局非常舒適又整潔， 餐桌似酒樓嘅擺設，環境清靜，好岩我地傾下計。整體食物質素高，無味精，健康又好味之選!溏心蛋拌胡麻沙律︰中餐擺設食西餐野好特別，配搭新穎!溏心蛋做得好好，配上芝麻醬沙律菜好開胃。花雕醉雞︰花雕嘅酒味好香，唔會話太濃帶澀，浸得夠入味!麻辣豬手︰好欣賞佢個豬手，唔肥又唔膩，豬皮好有咬口，食得出豬手經過好多個處理步驟，同埋佢個麻辣有香，好欣賞!炸BB鴿︰新鮮炸出黎，熱辣辣又夠香!魚湯浸豆苗︰豆苗非常幼細又新鮮，魚湯又夠濃!蜜椒牛柳粒︰,牛柳好大粒，好夠鑊氣，唔會過老，有肉汁又夠嫩，配菜都好新鮮，薯仔粒煎過且配上蜜糖後好香甜。XO醬鮑魚粒炒飯︰又係超有鑊氣嘅炒飯，D飯一粒粒，蛋香味十足，鮑魚粒煙韌又有鮑魚香味，配上其他配菜，成個飯嘅層次提高左。菊花豆腐甜品︰豆腐頂部雕琢成很多條狀，賣相似菊花好吸睛，薑茶清甜唔太辣，入口適中，大人細路都會鍾意，又靚又好食。