雲吞仔 (已結業)

同朋友行花園街時見到一間叫雲吞仔的麵店，門面裝修雖然簡潔，但幾有特色，於是同朋友入去一試。店內環境好特別，有5張介紹香港唔同地區的新舊對比相枱面抹得好乾淨，可能疫情比較嚴重，入店會聞到陣輕微消毒水味。我哋點左兩個面，兩個小食同兩杯熱飲，價錢都幾合理，唔算貴。準備開餐，感覺點多左，對我地唔算大食的嚟講肯定食唔晒。。。冬菇係我至愛，好大粒，好厚肉，都算炆得幾入味，麻辣豬耳仔都好好食，朋友唔太食得辣，但都可以接受到，我覺得好接近大牌米線店的麻辣豬耳果隻味，但價錢平好多。牛筋牛腩撈面雖然唔算有驚喜，但係牛筋同腩肉就炆得好淋好入味，面底太多，唔想浪費的話可以點餐時點扣底。朋友點左碗雲吞牛筋鯪魚球米線，超大碗。雲吞超多蝦，好大粒，有驚喜。米線好滑好有彈性，唔會有硬的口感，好食過好多大牌米線，真心推介。