圓山台灣料理 (已結業)

小弟聽日就要去台灣旅遊，臨去之前都會喺香港食番餐台灣菜！呢間餐廳叫圓山台灣料理，位於尖沙咀金馬倫道，一上到去就覺得好有台灣本土餐廳嘅感覺。就咁睇，呢間餐廳同其他中菜餐廳好似冇乜分別，但係細心啲睇，佢有好多台灣特色菜！第一個台灣名菜就係三杯雞，三杯嘅意思即係用三杯唔同嘅調味料去煮，分別係米酒、醬油、麻油。呢度嘅三杯雞一煮出來，香味四溢，滋滋聲，熱辣辣，味道唔會太鹹，啱啱好，夠哂麻油味。第二個菜就係鹽酥脆豆腐，豆腐炸到外脆內軟，再用椒鹽調味，令人食完再食！第三個菜好特別，係咕嚕黑豚肉，平時廣東菜就成日都會見到咕嚕肉，估唔到喺台灣都會有，仲要用黑豚肉！佢呢度嘅咕嚕肉做得好出色，先走油，令每塊都鎖住肉汁，外脆內軟，味道又啱啱好，唔會太甜或者太酸。第四個係台式雙拼，分別係辣鴨舌同鴨肉，鴨舌非常惹味，微辣，又大隻；鴨肉啖啖肉，非常容易吃！第五個係招牌鮑汁海鮮炒飯，炒飯好多料，又元貝粒，又蝦肉粒，又有蛋粒，超級好味，極力推薦大家試下。最後一個就係台灣A菜，好爽，好得意嘅感覺。總括而言，圓山台灣料理係得嘅，大家快啲去食下啦！