神輿日本料理 (已結業)

黎到旺角，行下街一定係我哋必做嘅事，之後覺得肚餓走來依度試吓。咁肚餓就梗係食放題啦，入到黎環境都幾大，坐得都幾舒適，服務態度都幾有禮貌，食物嘅質素都唔差。好似今次咁，我哋就叫咗個海膽壽司，同埋唔同嘅刺身，有三文魚，鮮蝦刺身，蟹柳，北寄貝...刺身嘅質素都幾好，幾新鮮，而海膽壽司，係最值得一試嘅，因為之前都去食過一啲放題嘅海膽，當然唔係海膽刺身啦，佢仲整咗海膽手卷，變相要食好多飯，但呢度就唔同，佢係海膽壽司，變相舊飯就可以細啲啦，你可以食多少少唔同類型嘅野。另外，我哋都叫咗個芝士焗大蝦，芝士焗蠔，芝士焗扇貝，呢一類型嘅焗野，最值得追加就係芝士焗大蝦。串燒方面，我哋就叫咗個牛仔粒，同埋雞軟骨。牛仔粒嘅串燒真係令人入口即溶，食過一定返尋味。放題來講，依個嘅質素，真係同其他無得比。整體來講，我都幾鍾意呢一間嘅食物質素，同埋佢嘅服務態度。