喜多嬉牡蠣屋 (已結業)

第二次嚟呢度食日本岡山縣北木島喜多嬉牡蠣養殖場直送新鮮生蠔。今次嚟到新店，比舊店大同舒服，牡蠣放題仲加碼由1.5到2小時，平嘅$498有生蠔燒蠔扇貝任食加一杯飲品，加多$100就可以任食串燒同任飲。仲可以加碼食吞拿魚腩刺身。先上海鮮湯同前菜燒大蝦，之後就上每人一大盤嘅喜多嬉懷石八品，有松葉蟹羊羮、象拔蚌刺身、燒和牛沙律、手工月見燒鳥串、喜多嬉牡蠣茶漬飯、二色燒活白鰻、涼拌秋葵、三文魚子吞拿魚蓉。之後就開始任食佢啲生蠔同燒蠔。生蠔配上柚子醋啫喱、辣蘿蔔蓉和蔥花，帶出蠔鮮味，加上質地軟滑。平時少食生蠔嘅我都食咗半打。串燒都好正，雞翼皮脆多汁，七里香，脆而不油。中間上埋個松葉蟹五島手延烏冬，係好滑身嘅烏冬。最後飲包食醉原來仲有甜品，係櫻花型狀嘅柚子雪葩最中餅．外皮特別脆，少少甜解一解串燒啲熱氣。