馬六 (已結業)

黑孖孖企響新浦崗工業大廈群中間，除左見到望落好近其實行去都幾遠嘅荷里活廣場外，就只有馬六 Malacca Cuisine同隔離間越南河係有光嘅。有啲餓有啲絕望，都係唔好諗，快速入去食嘢先。係嘅，我認我行入去時真係差唔多九點半，所以被last order 催單我都無嘢好講，不過點菜時，海南雞，無、雞絲，無，我又唔食叻沙嘅⋯⋯懊惱中，諗食乜諗到頭都大埋，廚房又嚟一次last order，見佢有個巴東牛肉飯我係啱食佢又有，就立即點餐，個朋友叫左個叻沙。兩樣嘢都快速上菜，不過我見個朋友食叻沙時，怪怪地⋯⋯味道係點我就唔知道，不過佢啲麵係米粉加油麵咁嘅款，係特色定係點？怪怪地⋯⋯至於我個巴東牛肉飯，無伏，幾好食，香料味濃，牛肉煮得軟淋入味，連食叻沙個朋友都忍唔住夾左舊食。叫左啲特飲，差不多食完都未到，催吓負責人，佢都好爽手咁即刻入去跟單同出埋。服務係有加分嘅。不過，嗰個二合一叻沙麵，真係怪怪地，之後特登上網搵下係咪我太無知真係咁樣做法，到而家都未能釋懷⋯⋯