李家 (麗灣大廈) (已結業)

最近先知西灣河有韓國餐廳啦！原來李家係西灣河開左分店，作為第一代香港既炸雞店，李家既人氣仍然不減，而且已經有四間分店，相信餐廳食物有一定質素。今日準時放工，決定試一試李家既炸雞！餐廳充滿各款霓虹燈裝飾，不過樓底唔高，感覺有啲擁擠。一坐低會送上免費醃蘿蔔同菜絲沙律。- 海鮮炸醬麵上菜嗰一刻有啲驚訝，份量非常多。醬汁呈深啡色，顔色同係韓國食過既地道炸醬麵如出一轍，而且一樣甜甜地完全唔辣。另外麵條幾煙韌，加上大量海鮮包括魷魚同蝦，口感非常豐富。- 蜂蜜蒜蓉炸雞（半份）小辣半隻有齊雞槌同雞翼，整體非常出色，首先粉漿唔厚，另外外皮香脆肉質嫩滑多汁，加上淋上大量蜂蜜，稱得上邪惡既美味😈如果蒜味再強烈啲就無可挑剔！另外仲叫咗兩杯梳打，分別係西柚梳打同蘋果梳打，價錢同樣$35。個人認為李家較適合多人聚餐，菜式份量好大，兩個人既話可能試唔到太多菜式。以我地為例，一個海鮮炸醬麵已經令我地超級飽。而炸雞的確出色，難怪李家可以屹立多年。