鮨玥 (已結業)

我最鍾意去食日本嘢，朋友話鯉景灣有間日本餐廳做得唔錯叫我去食，呢個朋友出名嘴饞，所以決定去試吓~入到去感覺好有傳統日本料理嘅格局，簡約乾淨，有壽司高櫈位坐。朋友仔極力叫我食嘅北海海鮮丼set，霸氣嘅size,刺身多到見唔到啲飯，濃味磯煮鮑魚，食落 咀嚼感強，特大牡丹蝦呈半透明好新鮮，吞拿魚腩入口即溶(真係好正)，加拿大海膽鮮味十分，仲好厚身，仲有吞拿魚，油甘魚，吞拿魚碎腩蔥花，池魚，每一款都係非常貴而好味嘅刺身，講緊咁高質素，竟然300蚊都唔洗就食到。另外跟set，日式燉蛋材料有冬菇，蟹柳，日本魚蛋，食落好滑好似食緊蒸滑豆腐咁。正呀啲嘢食都好滿意都攞晒100分，不過就憑呢一個 帶子刺身，分數爆到上120分，簡直可以媲美到我喺日本築地食嘅帶子刺身。爽口成條狀，急凍嘅帶子好難做到呢種質感。最後食返個蘋果雪芭，作為今晚嘅總結。蘋果味香濃而唔太甜，基本上同食真嘅蘋果味道係一樣。呢位嘴饞嘅朋友冇介紹錯，真係值得再去多次。