頑固壽司 (已結業)

疫情停不了，但生活總要過。兩個月無食壽司，心癮口癮都大發，朋友邀約下，決定稍稍放鬆一下⋯ 我地揀左K-11的頑固壽司，地方闊落而且係大型商場店，感覺衛生一點。睇一睇餐牌，壽司盛最抵食，三百零蚊有12件。但我又鍾意自己揀，心大心細，最後都係決定自選12件，價錢多少少，但就perfect! 帆立貝好厚身，咬落去的感覺好滿足。中拖羅大拖羅係唔同的口感同層次，中拖羅夠哂香而大拖羅就肥美到令人流哂口水！白蝦係時令食材，好好彩可以遇到，味道好清甜又軟滑。牡丹蝦好大隻，蝦頭仲有好多蝦膏。海膽係北海道貨，賣飛佛！小卷揀左三文魚。自定一個壽司盛比自己，又點少得熱食呢？火炙三文魚岩岩好做到半熟無過火，鰻魚係surprisingly good，香得來仲有少少脆邊。朋友仔的壽司盛賣相都幾吸引。滿足的一餐，唯一的小遺憾係當晚白子無貨，有機會要再去一試。