金記冰室 (已結業)

金記一向是老字號，它的蛋撻出晒名，晚飯小菜亦不錯。今晚在它的荃灣分店吃了晚餐，這裡裝修有點懷舊，地方大坐得舒服唔在講，而且感覺人情味滿瀉，因為啲伙記好nice。其中，認識到副經理德哥，他好健談，又會介紹有咩好食，更會幫我哋那些至為抵食，例如晚市精選小菜套餐。我們本想叫乾炒牛河，可惜，德哥好唔好意思，竟然還向我們鞠躬說: “河粉一早賣晒”。(我們真的受唔起)OK 嘅，唔食牛河，呢度仲有好多嘢食。之後，我哋就點了一個套餐 【小菜2 – 咕嚕魚柳】和一個小菜【滑蛋韭黃炒蝦仁】。德哥實在太好人，本來我們只是點了一個套餐，理應只包一個例湯和一個白飯，德哥卻送多一個例湯和一個白飯給我們。中、西式例湯各要了一個。中湯的是蘿蔔南北杏豬骨湯，西湯是羅宋湯。兩個湯的味道都屬於正常，沒有加味精的。兩個小菜的份量都好足。滑蛋蝦仁的滑蛋炒得老了少少，味道鹹了少少，但都OK嘅。而蝦仁就好大隻，食落都好爽口。咕嚕魚柳個汁好惹味好開胃，魚柳軟腍腍的，味道較滑蛋蝦仁好。最後是飲金記熱幼茶，茶味香濃，好飲!埋單時，德哥又走來，連聲多謝，慢走，真令人感動!