富久保手打烏冬 (已結業)

假日黎到尖沙咀，想食個下午茶都真係唔容易，一黎貴，二黎多人到不得了，無計可施底下唯有食food court啦。環境：話晒都只係food court，對環境都唔會有咩要求喇，但因為實在太多人，尤其d大陸人個個都拖喼，由搵位點餐以至食野都好迫好辛苦。同埋值得一提既係food court一邊有一排玻璃窗長期俾太陽晒住，加上多人，即係冬天都熱到邊食邊流汗。服務：其實眼見d姐姐已經好勤力執枱，無奈真係太多人食野，長期有枱未執。另外落單同收銀員態度好好，真係佩服。衛生：除左上面提到既長期有枱未執以外，其他衛生情況其實都可以接受既。味道：對food court既野食本身亦唔會抱太大期望，但叫左既餐都算不過不失。滑蛋雞肉飯幾足料，可惜飯太淋。烏冬唔彈牙唔好食。反而個小丸子唔錯，起碼真係食到八爪魚，唔會好似街邊食到個d得舊麵粉冇乜料既小丸子咁。抵食：86蚊一個set，咁既質素就唔會係抵食架喇，但係尖沙咀丫嘛，冇計啦。