ABC餅屋 (已結業)

順路經過，去探探舊公司的戰友，總要買點手信。家陣唔知搞咩，泰昌全天候都有人排隊，仲巴閉到一人限買半打。我當然無咁傻同咁得閒去排隊，食個牛油皮蛋撻，使唔使呀，就二話不說的來了這裡。呢度受泰昌一樣，只供應牛油皮蛋撻。因為下晝來，所以只有迷你的可以選擇，當然亦要買幾件這裡的皇牌~忌廉芒果酥餅。蛋撻剛出爐，到吃時還是熱熱的。有蛋及蛋白兩種，個人而言當然喜歡正常的蛋撻，吃落都香口一點。牛油撻皮鬆軟脆口，比較起來，其實也不比泰昌為差，只不過那裡名氣太響，搞到而家買個蛋撻都要排隊又要有配額咁；忌廉芒果酥餅仍然好味，酥皮略為不夠鬆脆，可能是不夠新鮮吧。買左兩打迷你蛋撻加8件忌廉芒果酥餅，71蚊，成十幾人食到唔食。下次如果想食蛋撻又見泰昌排長龍的話，可以試下呢度。題外話：呢度下午只供應迷你蛋撻，如果想買正常體積的蛋撻，要朝早來，或預早訂定。