鍋霸吃到飽台式養生火鍋 (莊士倫敦廣場)

營業中

休息中

如果只在乎同friend喺油尖旺區搵間坐得舒服嘅食肆慢吹水，閒時夾舊邊爐嘢嚼吓過口癮，呢間養生邊爐就真係啱去。放低位位三百幾，晚市6點入座，可以食住坐到凌晨12點打烊。期間侍應亦冇擾人嘅收碟舉動俾壓力食客要過主。除飲品、加湯湯jar、醬料自取外，鍋底叫職員下單，其餘火鍋配料手機落單，大部分配料按每枱人數已俾相對件數。「鹹蛋黃魚皮」埋位係每枱奉上，唔會過份鹹而有咸蛋味。揀嘅「蕃茄濃湯豆腐雜菌涮涮鍋底」都係藥膳成份，有條中指咁粗嘅黨參、去核紅棗，蕃茄7成切粒、3成切件，寫豆腐但實物係長形豆卜，三菇包括雞髀菇、秀珍菇、鮮冬菇。要注意可能濃湯呈茄膏狀嘅湯底，相當易黐底，平均半小時就自行添番jar杞子湯底落去調勻。此消彼長，既然俾食客長時間任點任食，食物就唔係平時放題燒肉中式火鍋大魚大肉嗰類，反而啱想食「清」啲嘅邊爐，菇、菜、不得不提手工肉丸，輕巧的骰有肉味。豬肉片係燈影咁薄，勝在豬味也濃。是日海鮮精選之沙白蜆每次點均有一隻灼咗都閉口，差啲。雞髀肉好大大舊，食完一舊已有脹胃感。飲品比較推介「桂花烏龍冷泡茶」，樽內細心地套咗茶隔，另外「黑糖冬瓜檸檬茶」低糖口感清爽；「烏梅山楂茶」比較多渣濃酸梅味。