新疆回族薄餅店 (已結業)

明明係正宗印度菜,整乜鬼個招牌叫新疆回族薄餅店呢? 英文都唔係咁叫既, 肯定比招牌佬整估, 亂安個九唔搭八既名比佢老細講番食評. 有次經過門口已經被佢地d食物吸引,今次醒起咪食晏時間落去買外賣. 必試既當然係samosa同我至愛既tandori chicken啦. 好感動samosa係自己搓粉做咖. 上星期同朋友去重慶大厦果間只係用我地廣東春卷皮包,幾鬼無誠意呀. 呢間舖仔仲忠於傳統,真係令人感動! 我試咗羊肉同什菜, 兩種都好好味, 皮又厚薄適中. 隻tandori雞鎚真係有驚喜. 味道同我係印度食既一樣,好香香料味. 雞肉仲估唔到咁嫩滑喎. 自從係印度食過,返香港咁耐未試過食到間可以做到d雞肉係唔'鞋'既. 另外叫咗個plain薄餅因為佢話無洋蔥. 原先以為可以叫佢跟d咖哩汁,點知佢話無喎. 惟有乾爭爭食囉. 如果可以用多少少牛油搓同做薄d, 會好味好多. 而家略嫌唔夠油酥.