馬師傅菜館 (已結業)

長沙灣其實係美食天堂，有好多非連鎖嘅 小店。佢哋嘅食物用心製作，非常高質。菜館亦都唔例外。舖頭門口唔起眼，行到入去先知原來入面好大，好乾淨，座位寬敞。當日星期六下晝，我大概兩點去到，舖頭仲有好多客人。有好多係熟客，有啲同經理有傾有講，有啲自己開埋白蘭地坐喺度慢慢歎😂菜館其實有啲似酒樓，佢有好多海鮮，又有燒味，又有小炒，都幾多食物選擇！我叫咗蒜蓉炒西蘭花68蚊， 燒腩仔湯米48蚊， 馬師傅鮮蝦餃（2粒）20蚊。我幾鍾意佢啲點心兩件起四件止。 可以每樣試少少，冇咗飲茶一定要一大棚人飲嘅限制。叫得馬師傅鮮蝦餃果然係招牌菜，蝦餃好大粒，蝦肉好大粒，足料好味，皮薄餡靚。燒腩仔湯米：燒腩仔同米粉分開上，雖然48蚊唔平，但係佢真係畀足成碟燒腩仔，而且燒腩仔嘅位都好靚，每舊都有少少肥膏，個皮炸到脆咯咯👍👍