新斗記 (已結業)

難得黎到新斗記食晚飯，當然唔少得叫呢到的招牌菜火山石燒乳豬啦！乳豬一上枱即飄來一陣陣肉香味，隻乳豬燒得又香又靚，而且外皮食落香口之餘仲勁脆，入口卜卜聲。而乳豬肉咬落好嫩又juice，唔會燒到乾晒，真係明乎其實的外脆內嫩，好食！除了叫乳豬食外，還叫了豉椒炒聖子皇、碧綠炒花枝及蛋白薑米蒜香蟹飯，今晚又有口福了！熱辣辣香噴噴黎到的豉椒炒聖子皇，好香鼓椒味，令人好有食慾！聖子肉質爽口又入味，份量又多。而青椒及洋蔥亦炒得好吃，夠鑊氣，真係飯都可以食多碗！而碧綠炒花枝其實係西蘭花炒魷魚，顏色好吸引。清甜翠綠的西蘭花配上爽滑的魷魚片，呢個配搭好夾，好吃。最後係蛋白薑米蒜香蟹飯，隻蟹用上大量蔥蒜蒸，未食都已經聞到濃濃的蒜香，同埋隻蟹都幾多蟹膏同蟹肉，食落味道清甜而且好香蒜味。而米飯除了吸收蟹的精華，我們亦將蟹膏撈埋入飯中，令味道更鮮甜美味。而且飯入面本身加入了薑及蛋白，口感變得更豐富。好食到令我不自覺地食了兩碗飯。