上戶酒場 (已結業)

放工同同事落咗九龍城覓食，原先諗住食泰國菜，點知經過呢間上戶酒場，我哋就突然都係想食返日本菜，見有位就即時轉軚XD店內裝潢非常日系，難得嘅係座位寬躺，座位之間有足夠距離，唔會坐得迫澀，好啱傾計gathering！一坐下，店員先送上野菜條前菜，呢道前菜頗有驚喜，因為鯷魚醬都係師傅每日新鮮即整！鯷魚醬充滿鹹鮮，估唔到同爽甜嘅野菜條好夾！完成咗大project，我哋都決定食好D！點咗一條鯛魚刺身，整條鯛魚片成刺身，份量好多呢！鯛魚肉質紮實，味道鮮甜，配sake一流！食完刺身之後，店員亦幫我哋將魚頭及魚身攞去整天婦羅，一魚二食！蒜片赤雞腎都唔錯，雞腎口感爽彈，面頭鋪滿黑椒蒜片，蒜香十足，調味啱啱好，唔會太鹹，又係送酒恩物！明太子奄列值得一試。奄列煎至表面金黃，內裡仍然好嫩滑，仲見到蛋汁呢！包住明太子，更添鹹鮮，配埋面頭嘅木魚絲，充滿和式風味！