粗店燒烤 (已結業)

旺角呢間新開嘅燒烤店好有特色，簡約得嚟又令餐廳環境望落開揚整潔。每張台都有一包吊起嘅紙巾，方便抹手之用，够曬細心！餐廳嘅串燒種類有好多；雞、豬、牛、羊、海鮮、蔬菜樣樣都有，飲品除咗汽水仲有啤酒可以選擇。打開手機用QR code落單既方便又快捷。落完Order，店員會放置調味料到客人嘅碟上，然後將旁邊嘅小爐燃點起嚟，佢嘅用處係保持串燒嘅溫度，等串燒唔會放涼。今次食咗好多唔同種類嘅串燒及燒物；扇貝鮮甜配搭粉絲，粉絲吸收曬扇貝同蒜蓉嘅味，真係唔錯。生蠔燒得啱啱好，上面舖滿蒜蓉同蔥，入口味道香濃。蝦連壳嚟燒，食落去鮮甜。燒魷魚一串勁多，鮮味爽口。燒雞翼係不可缺少嘅一員，雞翼燒至外脆內嫰，入口Juicy。雞軟骨及雞腎都燒得香脆爽口。五花肉層次分明，入口充滿油香。燒韭菜香口又嫩滑。燒茄子够曬大份，仲有菜脯嚟調味够惹味。串燒以孜然作調味係店中串燒嘅靈魂，惹味到令人欲罷不能。