Grill n More (已結業)

Lunch見到油塘開左一間新餐廳，當然要去試一試。我決定豪一次食個燒肉放題，90分鐘任食任飲，有熟食和供燒烤的生肉，各樣都有好多款式。由於有d肚餓，一黎就拎左d可以即食既野，分別有藍莓芝士蛋糕，芒果啫喱同鮑汁炒飯，三者味道都幾足，絕對不馬虎。之後拎左唔少，主要係豬、牛、雞同魷魚，其實仲有多春魚同各種蔬菜，但本人係唔食魚既食肉獸，所以無理會到。前前後後加埋有三、四十種燒烤食材走唔甩。所有肉類都非常之咁新鮮，唔似有雪藏過既痕跡，每款我都試過小小，最值得推介既就係牛仔粒，我總共拎左三次，每次份量都唔少，好似食極都唔夠咁。首先肉質鮮嫩，脂肪較少，燒熟左之後食落口好彈牙，牛肉味好重，而且細細粒，燒的時間比較短，會不停燒不停食。另外，今次佢送左一隻好大既虎蝦，雖然未至於會跳，但都幾新鮮，要燒比較耐，但燒熟之後都會覺得好值得，肉質好爽口，味道好鮮甜。最後係甜品，佢有一個紫色既噴泉，可以用黎點綿花糖，不過唔好點太多，因為兩者加埋一齊會有點過甜。旁邊仲有個雪櫃，里面有不同味道的Dreyer's雪糕任食，雪糕保存得幾好，唔會硬到石頭咁。