牛扒先生 (德福廣場2期)

營業中

休息中

諗住父親節帶家人鋸下扒，點知中巨伏，整體而言係非常差！明白父親節正日坐爆場係要接受行出行入迫啲同等餐等得耐啲，但冇諗過要等半個鐘以上先有。自助吧選擇亦非常少，質素普普通通，甜品偏甜。揀左$378/$358價位嘅西冷同肉眼，不論5成定7成熟都變左9成熟，硬過擦子膠，家人一致認為花園餐廳嘅扒都好過佢，起碼唔會靭成咁。燒春雞亦都係冇味同靭，實在難以想像呢個價位同專做扒嘅餐廳出呢種質素，令人大失所望。另外，呢個價位原來淨係包一杯飲品，但餐牌同侍應一開始冇表明，到去自助吧見飲品係放出嚟以為係可以拎，點知侍應即時隨手收起我個杯，表示飲品唔可以自己拎，每人係一得杯，唯有另一名似係高級啲嘅職員表示拎左就由得客人拎。如果係一早講明每人限一杯或吧枱有牌仔寫明非自助飲品就唔會令客人誤會。總結係絕對冇下次，呢個價位連埋加一的話可以有更多好選擇。