Shine (已結業)

上次見客呢間餐廳幾好，坐得舒服，食物又唔錯，今晚又同男友黎撐枱腳。我地點左一個主菜，一個意粉，一個小食同湯，一齊share食。龍蝦湯-感覺比較稀，如果再濃郁啲就好啲，不過有龍蝦肉，仲要係鉗，唔錯。脆炸魚柳條配他他醬賣相好靚，魚肉有鮮味，粉醬夠脆，熱辣辣食就岩晒北海道帶子明太子意粉配三文魚籽，呢個出乎意料咁好味，大大粒鮮甜帶子，三文魚籽夠新鮮，明太子汁都好多，好濃郁，正！最後主菜是法式煎鴨胸配香橙汁，份量好多，擺碟非常吸引，鴨胸係高檔貨式，食到鴨肉鮮味，而且仲有法式油鴨既香味，不過皮比較多油，可能女仔會怕肥，而且店員有提醒鴨肉會有啲鞋，等客人有心理準備，但食落又唔覺，反而覺得鴨肉應該係咁，平時食開雪貨先淋。