不要對我尖叫，日常茶間， (中環大廈) (已結業)

今年五月去台北果陣因為個logo而特登走去朝聖，冇諗過隔咗半年又可以響香港飲返😂 有樣嘢幾驚喜係佢除咗啲奶類大部分嘢飲啲價錢都係十幾到廿幾蚊，以開響中環地段兼同其他過江龍相比之下都幾貼地✨同埋好鐘意佢主打冬瓜菊花，響遍地黑糖珍珠嘅香港簡直係一股清泉，要知道我試過好想飲冬瓜茶然後間間都淨係賣奶同水果茶而發脾氣😂 至於質素方面同台灣飲嘅相差無幾，同樣地入面都係有兩朵菊花浸泡住，通常一過江自然會打個八折，但佢又keep到喎😌另外莓果洛神氣泡飲呢杯如果響大熱天時飲就簡直不得了，同樣係成朵洛神花塞咗入去，莓果同洛神兩種截然不同嘅酸甜味混埋一齊，再加埋梳打水果種爽快感真係解渴到爆😍 有朋友叫杯桂花咖啡牛奶，啜咗啖都幾香，係桂花味可以再重啲，不過配地瓜芋圓好鐘意，細粒煙韌，比珍珠再軟身啲，啱哂鐘意食腍嘢嘅我😛其實呢間嘢都應該會必火，開響蘭芳園出面個分差街角位，人流幾旺佔盡地利，至愛嘅冬瓜菊花夠膽只賣十八蚊杯夠抵飲，期待佢將來會出香港限定口味🤤 話說睇返上次台北話要試佢個水果茶，今次都係冇試到，下次要試下先😂