雄記粉麵 (已結業)

其實並唔知呢間雄記有幾出名，只係去完愉景新城之後行街路過見有D人食所以試下，真係無諗過會有D咁差經歷，真係唔寫俾大家注意一下唔得。我两大一細共3人，一入舖就被安排坐近門口角落嘅一張圓枱，而當時已經有两主僕帶两個細路囡共4人坐緊，我見到就已經唔係咁想坐低，而且店旁邊二人方枱係有位嘅都無安排我哋坐，但因為當時外面落緊雨，心諗都係食下麵姐，好快搞掂，姑且忍下啦。我哋叫咗一碗牛丸牛腩麵，一碗牛筋麵，個老闆就叫我叫杯嘢飲或者叫碟油菜，咁我問佢點解，佢先講話有“最低消費”，所以咁叫就差唔多喇，我當堂呆一呆…… 一間咁嘅麵舖都有最低消費？？真係想講粗口！好，又算，叫多杯凍咖啡……知道會收最低消費之後我就周圍望下，見到貼咗張紙寫住，但無寫會收幾錢嘅，而我亦發現又寫住唔可外帶食物飲品入舖，否則要多收10蚊。之前我個仔有支未飲哂嘅寳礦力帶咗入嚟，而我老婆就放咗响門口嘅窗枱邊，我心諗唔係無飲過都要收嘛……，諗諗下都係計定數先，計咗一下两碗麵一杯凍咖啡最多咪收我90蚊……食飽咪叫個阿姐埋單囉，阿姐面黑黑寸寸共咁話115蚊，單又無，解釋又無，真係有無搞錯呀……結論…… 姐係最低消費35蚊位，加所謂外帶飲品10蚊