民園麵家 (已結業)

成朝都冇人搵我，老細卻大整蠱臨放lunch前十分鍾就來捉住我...畀人釋放後大家已經走晒，唯有自己一個去搵食。平時一大班人一定唔會走太遠，見今日自己一個就去遠啲，走到上去民園食野，被安排坐出面，好彩有個大風扇吹住。叫了一個牛腩雲吞撈麵，要腩汁（另有豉油可以揀）。牛腩夠腍，而且好入味，食左第一啖立即對整碟麵的期待提高。雲吞就細細粒的，有三四粒。入面的蝦肉同豬肉比例大概一半一半，味道不錯，但啲肉就稍為實左啲。牛腩同雲吞都不錯，真係諗唔到出事的竟然係個麵。麵質方面當然唔係靚麵，唔夠爽口，不過都預左係咁所以冇所謂。問題在於梘水味重得過份，重到苦澀的地步，腩汁又好少唔夠蓋過啲味，食到成個口澀晒，最後即使唔飽都食淨...。走的時候先發現冇現金係身，問老闆娘邊度有櫃員機即刻去攞錢畀佢。佢就話︰「唔緊要啦，你聽日來過先畀錢都冇問題。」雖然係咁，小弟唔想再來過食梘水，即刻去左攞錢畀佢。個麵有點兒過份本應畀個喊臉，不過見所有伙計的服務都好親切，就畀個OK你。