前家樂餐廳火鍋店 (已結業)

今日收工約左班大同gathering食飯，除咗鍾意食烏冬，小姐都好鍾意食魚既。今日就嚟到大角咀嘅前家樂食烤魚！！！店名非常之盞鬼，聽聞前身係叫魚文樂哈哈。因為人多，我地分開兩個煲，叫咗條大邊海鯇魚，另一邊叫咗個醉雞煲。魚嚟講呢，講究都係幾樣野：滑、鮮、香，呢條海鯇魚係個番茄薯仔湯底度滾滾下，香到冇人有，魚身有成隻手前臂咁長，本身條魚一嚟到係五成熟，再滾五至十分鐘到就啱啱好夠熟食得，魚肉滑到不得了，加埋塊煎香左既魚皮一齊放入口，令人一食再食，我諗我一個人都食左半條。食到咁上下飲淡湯，番茄味加埋鯇魚嘅鮮味，正！不禁即刻落個讚歧烏冬吸晒啲湯汁。讚歧烏冬掛上鮮魚湯，令人欲罷不能啊，而且烏冬水準不差，正宗夠煙韌～其他配料其實都唔錯，都係叫啲大路野，木耳，生菜，肥牛，響鈴，竹笙，芝士竹輪，蟹棒。牛肉太厚，比較難咬，木耳生菜爽口，竹笙響鈴無得輸，索晒個湯汁，芝士竹輪同蟹棒似係吉野家果種既味道。