地點：銅鑼灣登龍街
菜式：川菜
餐牌：主菜，涼菜，甜品，飲品，都有套餐。落單用QR code。
11
不二酸菜魚 $168 另加一
不二酸菜魚超大碟，好多連皮滑溜魚片配有大量酸菜加萵苣片，仲有少少菇片，最後灑上黃色花瓣，材料豐富新鮮，魚有魚味。
可以揀辣度或者唔辣，我地叫左唔辣，都好夠味，鹹度剛好。可加$20要寬粉，寬粉滑溜煙韌，好味。
香辣蝦 $168 另加一
香辣蝦超大碟連個鍋上枱，脆皮連殼連頭蝦有十幾隻，整得好香口，加有好多炸薯條做配菜好邪惡，口感軟淋，撈埋大量辣椒同花椒加芹菜條，可以揀辣度，我揀左少辣，食落把嘴微微麻。唔錯。
口水雞 $68 另加一
口水雞有唔少連皮雞肉加上辣汁，面頭灑上花生碎同蔥花加白芝麻粒，下底墊有青瓜粒。鷄皮薄，鷄肉嫩滑有鷄味！可以揀辣度，我揀左少辣，辣度夠嗮。
白飯免費，抵！
芒芒梳打 $28 另加一
百香果梳打 $28 另加一
梳打超大杯，附上獨立包裝飲管。芒芒梳打芒果味濃，唔會太甜。百香果就清新d，仲加有青檸一件，而且帶熱情果子。兩杯都好解渴。
總括而言，食物質素高而好大份，呢個價錢抵食！
