Thai Smile (已結業)

泰式食店响上環唔多，而且口味都有大幅調教過黎遷就香港人口味。不過最近新開咗間泰式食店，現於試業期間，只供外賣，$45蚊兩餸飯，同區唔算貴，冇理由唔試。女婿蛋 - 味道甜甜哋，有啲似中式牛柳汁，蛋係全熟蛋，外層炸過，容易上汁，芫荽，蔥酥，辣椒非常惹味。泰式紅咖哩 - 望落唔夠紅，但食落超有風味。雖然味道都有點甜，但香味十足，用料齊全。連普遍泰國餐館唔用嘅豆茄子都有落，豆茄子味道微甘，裡面有種子，食嘅時候爆發出獨特清爽嘅香氣。還有如乒乓波大小嘅小白茄，都係泰菜常用嘅，茄子吸收咗咖哩汁嘅精華，加上嫩滑口感，餸飯一流。汁料味精層次多，香料味道分明而融恰，很不錯嘅咖哩。蝦醬炒飯 - 味道都係偏甜，蝦醬味唔夠出，但味道整體有百吃不厭之感。櫻花蝦磨碎撈入飯中，點點鮮紅色為炒飯觀感上帶黎唔少生氣。等飯時，同老闆娘傾咗兩句。據講，店舖選用泰國食材，連豉油都係泰國貨，盡量保留原有風味。不過老闆娘承認，佢嘅泰菜係有調整到適合港人口味，但亦忠於原著。食店大廚Apple係泰國人，對於泰國傳統菜做法熟悉，亦喺香港居住多年，認識香港人口味。