Brewed

上環「Brewed」係一間朝啡夜酒Cafe，室內環境氣氛溫馨、輕鬆又溫馨，餐廳不算大，可以見到Staff喺你附近為你烹飪食物，食物款式比較罕見，估唔到我居然對北非菜一食就愛上，所以推薦大家依間餐廳。不過我離開後，先後知後覺發現Staff原來喺上菜：土耳其式流心蛋配香烤雞肉嘅時候漏咗俾酸種麵包。Staff推介白酒Lowlands Single Vineyard Sauvignon Blanc Marlborough 2024好適合女士們飲用，比較容易入口。因為餐廳有多款紅、白酒供應，所以當然有推出Free Flow Package。

*此餐廳收取全單10%服務費。

意大利辣肉醬貓耳朵（單點$128），表面鋪滿巴馬臣芝士、火箭菜，辣肉醬忌廉汁肉碎份量多，口感非常Creamy，令每一粒貓耳朵粉都好掛汁，貓耳朵粉口感煙韌，味道香辣，而且食落充滿芝士味道，但不會容易覺得有膩感，配菜包括有車厘茄。

土耳其式流心蛋配香烤雞肉（單點$148），雞扒肉質厚身，口感外焦脆內嫩滑，採用啤酒醃製，食落帶有中東薩塔香料味道；土耳其式流心蛋流心效果突出，配以希臘乳酪、五香牛油、菲達芝士、鷹嘴豆泥、中東羅勒芝麻醬、哈里薩辣醬、火箭菜、青瓜食用，食落好惹味。

招牌沙律 （跟餐$40），好足料，包括有火箭菜、紅毛生菜、羅馬生菜、青瓜、車厘茄、核桃、蔓越莓乾、多士麵包粒，配以中東羅勒芝麻醬、哈里薩辣醬食用，味道清新，食落好有驚喜。

英式鬆餅（單點30），招牌Scone口感外酥脆內鬆化，採用French Elle & Vire Unsalted Butter製作，牛油味道濃香，配以Clotted Cream、草莓果醬食用，味道正宗。

酸種麵包（跟餐$15），烘得麵包邊位口感香脆，內裏鬆軟、濕潤，食落不會覺得乾身。

凍焙茶鮮奶（單點$50），茶味濃香。

1