影片
更多
2017-05-22
10920 瀏覽
今日心情特佳, 約了友人上太空飲茶, 你無聽錯, 相比起一般酒樓的層數, 這兒....的確係太空, 位於100樓..., 咁樣樣..., 100層樓就當中絕對有水份, 香港發展商起樓, 逢4、13、14、24、34...., 有時連 7字都無埋...., 100樓..., 分分鐘可能只係80樓左右, 但80樓, 對我而言, 都係好Q高. 同層有四間食肆, 全都水淨鵝飛, 咁貴價既午餐, 無幾多人會天天食啩....衰鬼...., 一路行一路講電話, 不自覺走咗上 天龍軒的酒店樓層, 最終要搵人用鎖匙開部"笠"比我落翻嚟... (其實, 是可以坐翻電梯落地下, 再由另一部電梯上, 但咁樣......, 無錯! 係我懶....), 一入龍璽門口, 轉左, 有一行Bar檯, 另一面就是大酒櫃, 大量高級貨呀, 龍璽的食物定價, 比天龍軒低二、三十巴先, 但餐酒價就相差無幾, 大概八百蚊一枝至過萬都有, 酒水用嚟掠客就梗架啦, 重使你教咩...大廳, 一眼見晒, 約12張檯, 窗口位只有五、六張..., 但就係咁好彩, 竟然有窗口位, 好開心...., 要感激侍應姐姐幫忙! 貼住窗口兩個座位,
今日心情特佳, 約了友人上太空飲茶, 你無聽錯, 相比起一般酒樓的層數, 這兒....的確係太空, 位於100樓..., 咁樣樣..., 100層樓就當中絕對有水份, 香港發展商起樓, 逢4、13、14、24、34...., 有時連 7字都無埋...., 100樓..., 分分鐘可能只係80樓左右, 但80樓, 對我而言, 都係好Q高. 同層有四間食肆, 全都水淨鵝飛, 咁貴價既午餐, 無幾多人會天天食啩....
衰鬼...., 一路行一路講電話, 不自覺走咗上 天龍軒的酒店樓層, 最終要搵人用鎖匙開部"笠"比我落翻嚟... (其實, 是可以坐翻電梯落地下, 再由另一部電梯上, 但咁樣......, 無錯! 係我懶....), 一入龍璽門口, 轉左, 有一行Bar檯, 另一面就是大酒櫃, 大量高級貨呀, 龍璽的食物定價, 比天龍軒低二、三十巴先, 但餐酒價就相差無幾, 大概八百蚊一枝至過萬都有, 酒水用嚟掠客就梗架啦, 重使你教咩...
大廳, 一眼見晒, 約12張檯, 窗口位只有五、六張..., 但就係咁好彩, 竟然有窗口位, 好開心...., 要感激侍應姐姐幫忙! 
貼住窗口兩個座位, 當然要先讓比女士..., 但坐出一個位, 反而不是背著窗口, 可以一邊食, 一邊望向港島景色, 更開揚, 食得更舒暢啦..., 無海景..?? 我食唔落飯囉...!
由高處望各向地面, 的確氣勢磅礡, 想刺激一點, 就要企得貼近窗位, 再少少斜身按著玻璃窗, 向下望, 幻想向下跌, 又驚又興奮的感覺..., 好變態.... 
所謂高級酒家, 點心不需多, 夠精美就夠了吧...., 平均六、七十元一客, 相比於一般地面酒店內的酒家貴了10%左右, 也算合理. 炒粉麵飯, 平均二百幾蚊一客, 也都尚算可以, 記得荃灣的熊貓酒店, 炒飯也要二百, 但對外景觀全是高樓大廈, 這裡多付三、四十, 可以上到太空, 算抵啦.....
沙巴水晶海蝦餃 $65, 香港既酒樓, 真係創意無限...., 沙巴出產的海蝦是否有名, 這點不太清楚, 但"水晶海蝦"這個名字, 就真係第一次聽..., 養開魚的人, 都一定知甚麼是"水晶蝦", 但好似唔係用嚟食個喎..., 有少少一頭霧水. 一籠四件, 每件貼有少許金箔, 金箔是甚麼味道?? sorry..., 黃金咁高價既嘢, 我通常買嚟帶, 無食開..., 也食唔出係咩嘢味..., 無論如何, 加咗少少... 大概3mm 份量既金箔, 這籠蝦餃, 可以收多你30%價錢, 絕對係小本多賺的生意, 但又咁樣樣...., 五年前係跑馬地譽滿坊既蝦餃, 已經賣90蚊一籠, 重要係得兩隻, 即係45蚊一隻蝦餃, 呢到一百樓高重有無敵海景, 都只係65蚊一籠, 簡直就係超值啦..., 至於件沙巴蝦餃的味道如何??? 哽... 同利苑差唔多, 皮做得夠彈力, 蝦仁呢....., 都係唔太有蝦味...., 都話同利苑差唔多囉.....
黑松露素粉果 $60 (3件), 一眼就見到, 皮晶瑩剔透啦, 內裡餡料也整整齊齊, 好精神, 入口..., 講明係黑松露, 梗係有黑松露味啦, 你問"黑松露真定假????", 點會係假??? 一樽樽既黑松露醬, 兩間大型超市都有得賣, 得閒去睇下, please!
蜜餞叉燒包 $68 (4件), 從外表而言, 一望就知道係屋村酒樓貨色, 期望當堂降了幾個價位, 咬一啖..., 又升翻高些少, 有"稻香"既水準啦..., 但稻香既叉燒包, 好似賣廿蚊一籠, 好似係.... 
鮑魚燒賣 $70 (4件), 有金箔既蝦餃, 收六十五蚊, 而... 只有四件的豬肉燒賣, 收得你幾多錢吖!?? 賣唔到高價, 想吓辦法...., 加一塊小鮑片, 雖然只有2cm, 但當堂矜貴咗幾級以上, 味道??? 我保證: 一定有燒賣味!! 有無鮑魚味...??? 梗有, 當我知道係鮑魚之後, 飽魚味道更濃!! 哈哈哈...
芥末咸水角 $60 (4件), 餐牌上寫的是"芥末咸水角", 而找數時看單據, 是寫"珍珠咸水角"...., 上檯時, 掛住與友人吹水, 講緊公司八啩事, 太興奮..., 我真係唔太記得味道了, 但隱約回想, 應該係無芥辣味的..., 但我又記得好夠熱, 外皮也算脆中有煙韌, 算滿意了.
金鵲歸巢 $80 (4件), 其實即係"芋角", 但在芋角頂端, 放了一隻鵪鶉蛋, 友人見到, 即時晒手兼拎頭, 佢話..怕膽固醇超標..., 我同佢講, 鵪鶉蛋黃咁細, 你剛才食既蝦餃、鮑魚、還有炸過既點心, 膽固醇都唔少喎...., 不過, 人就係咁喇, 鍾意食既嘢, 就會話: "間中食一次無所謂", 唔鍾要食既, 就會話: "無益, 一次都唔食..." 激死...
香蒜一口牛 $98, 看餐牌, 以為是炸香蒜和沒有醬汁的牛柳粒, 上檯時, 發現是用麵根豆腐伴炒, 加入了醬汁, 另外還有一圓錐形網狀裝飾, 這個圓錐形網狀裝飾, 咬一口, 好韌, 都唔知係嘜嚟....??? , 九十八蚊一碟, 有七粒牛肉, 貴??? 一點也不貴...!! 相隔不足三天, 在樓上"天龍軒", 一味"甜椒豆豉和牛粒", 都係有七粒牛肉, 牛肉粒大小與這間差不多, 單價是$648, 這間是只是$98.... 係味好抵呢...???? 哈哈哈...
客家佬鹹魚炒飯 $220, 侍應分前, 忘記了先拍照, 分得每人一細碗, So..., 高級酒家, 算係咁上下..., 水準中等以上, 飯身粒粒分明, 而且完好無爛角, 材料切得大小適中, 不似有些酒樓, 肉粒瓜菜又大又小, 口感不佳, 但就欠缺一份大鑊氣, 以炒飯來說, 天龍軒和龍璽的出品, 都比不上沒有海景的"海景軒".
落單要了各款兩份的 "新彊棗皇糕" ($15) 和 "椰香桂花糕" ($15), 掛住吹水, 又漏拍了其中一份"椰香桂花糕", 無所謂啦..., 兩款都與我無緣...
我對"糕"無興趣, 要了一碗蛋白杏仁茶 ($45), 水準與屋企附近間"芝麻綠豆甜品店"差不多, 少甜, 尚算滑溜, 唯欠了一點香...., 平均一位$300 的午餐，有百三蚊係高層海景嘅成本，淨低百七蚊係食物，算中規中矩吧 ....
張貼
