Green Orange

約左一班舊同事食飯，想搵間坐得舒服傾下計既地方，一於試下呢間係上環地鐵站附近既樓上西餐廳。環境：呢度地方唔算十分大，但四人位都幾寬敞，坐得舒服，加上呢度燈光偏暗，增加左私人度，岩晒情侶或者三五知己聚會傾計！服務：呢度既侍應好有禮貌，仲好主動不時幫我地加水、換碟、切菜，服務滿意！衛生：因為燈光比較暗，所以感覺地方尚算新淨，當然枱凳同用具係乾淨既。味道：Caesar salad不嬲係我至愛，呢度既比較簡單，菜、麵包、煙三文魚，加上少許sauce，個人覺得咁樣反而更加適合作為前菜開一開胃。另一starter係青口，雖然係starter，但都有好多隻喎，配住稀稀地既忌廉湯，都係一個唔錯既開胃菜。焗蟹肉酥皮，餐廳推介果然有驚喜，未食已經聞到好香，一啖肉配一啖飯，再配上黑松露，不知不覺間就食晒！脆焗豬手配蜜糖芥末汁，又係餐廳推介，豬手焗得非常脆亦都幾大份，配埋個honey mustard sauce令豬手變得不一般！抵食：starter百幾蚊，main dish二百幾蚊，其實都係西餐中位價，最緊要氣氛夠，坐得舒服，就值晒了！