影片
更多
2014-09-15
10522 瀏覽
XO仔身患食物敏感症，由細到大都唔多食海鮮，不過長輩請食飯，無論係素菜或海鮮宴，小弟有空必定賞面出席 。今次Auntie N所揀選o既「好彩海鮮酒家」，以海鮮聞名，感覺亦較舊，起初都有少少驚自己會唔慣，勢估唔到海鮮宴中亦有多款菜式啱小肥口味，食完餐飯仲足足重咗一公斤 ！上環「好彩」地點都幾就腳，乜車都到，唯一問題係放工時候路面頗為擠塞，所以最方便都係搭附近都有站o既地鐡同電車。酒樓樓面低，裝修唔算係好陳舊，不過室內有幾件較潮o既擺設就好似有少少格格不入咁。此外，盡管當晚只有兩、三枱散客，一出升降機已經覺得幾嘈，好在Auntie N係熟客，請客一早安排咗間廂房，我地一圍十二人都坐得好鬆動舒適。「好彩」o既餐具款式其實有少少過時，當中雖然未有崩裂碗碟，但就開始有退色現象，同新淨金黃o既餐巾好似唔多夾，所以輕輕扣咗分衛生分。房入面有位叔叔負責分餸，不時亦有位姐姐為客人加添茶水，斟酒方面就稍為慢咗少少啦，好多時都要我地自己黎。經理哥哥都有入過黎跟進食物，問及auntie對各方面o既滿意程度，當XO仔要求印出菜單，佢都好有效率地辦妥，態度友善認真 。 堂剪乳豬全體：「好彩」貴為海鮮酒家，
上環「好彩」地點都幾就腳，乜車都到，唯一問題係放工時候路面頗為擠塞，所以最方便都係搭附近都有站o既地鐡同電車。酒樓樓面低，裝修唔算係好陳舊，不過室內有幾件較潮o既擺設就好似有少少格格不入咁。此外，盡管當晚只有兩、三枱散客，一出升降機已經覺得幾嘈，好在Auntie N係熟客，請客一早安排咗間廂房，我地一圍十二人都坐得好鬆動舒適。「好彩」o既餐具款式其實有少少過時，當中雖然未有崩裂碗碟，但就開始有退色現象，同新淨金黃o既餐巾好似唔多夾，所以輕輕扣咗分衛生分。房入面有位叔叔負責分餸，不時亦有位姐姐為客人加添茶水，斟酒方面就稍為慢咗少少啦，好多時都要我地自己黎。經理哥哥都有入過黎跟進食物，問及auntie對各方面o既滿意程度，當XO仔要求印出菜單，佢都好有效率地辦妥，態度友善認真 。
堂剪乳豬全體：「好彩」貴為海鮮酒家，居然能夠燒出如此鬆化脆嫩o既乳豬，小肥真係愕咗然 ！意料之外o既仲有伴豬o既麵包，可以話係細佬食過最鬆軟熱辣、最香甜美味o既一家，難怪當晚碟乳豬同麵包一出，短短十五分鐘就已經掃清，一件都冇得剩 ！
白灼游水蝦：游水蝦新鮮爽口，簡單白灼已經好夠鮮甜，果然真材實料！
杏汁燉白肺：白肺湯好足料，白雪雪、滑嘟嘟o既豬肺洗得又夠乾淨，加咗杏汁一啲都唔粉，飲落清甜潤口，舒暢暖胃。
酥炸美國蠔：嘩，啲蠔真係好巨型，上枱時已經夠震撼，入埋口簡直係不得了！蠔本身肥美，師傅酥炸時間掌握得好，所以做出黎層炸皮薄脆o既同時，蠔o既質感仍能保持嫩滑，效果非常好 ！
蒜茸粉絲蒸元貝：帶子連殼原隻上，每人一隻，好有睇頭！大大隻o既帶子好厚肉，有少少嚡亦屬正常，不過最美味o既就係底層入哂蒜茸味o既粉絲。
上湯焗龍蝦伊麵：據經理哥哥所講，龍蝦從澳洲入口，味道比波士頓龍蝦更為濃郁清甜，肉質豐厚得黎亦較為爽口，XO仔唔係好識比較 ，不過都覺得當晚個味龍蝦真係幾香甜爽脆，咁唔知價錢又係咪相對地比波士頓龍蝦貴呢 ？！
粥水浸蕃薯葉：蕃薯就見得多，小肥真係唔知蕃薯啲葉都可以煮黎食，仲要用米湯煮浸，真係好特別！蕃薯葉貌似莧菜，食落就似菠菜，口感軟腍，食完條脷又唔會嚡，比起莧菜及菠菜略勝一籌。
環球鮮果盆：唔知同Auntie N係熟客有冇關係呢 ，啲菠蘿同西瓜都超甜。
美點雙輝之芝麻糕：新鮮滾熱辣蒸出黎o既芝麻糕屬微甜，清滑煙韌，幾得意。
雙皮奶：食完咁多味餸菜及甜點大家都已經飽到攬住個肚，點知auntie居然仲有一款壓軸甜品「雙皮奶」，一人一大碗，勁量級過勁量級 ！雙皮奶香嫩幼滑，甜度恰到好處，auntie真係冇介紹錯，嘻嘻，小肥亦老實不客氣，食埋媽咪嗰碗 。
今次真係非常感激Auntie N安排咗依頓豐富o既「七彩海鮮宴」，令XO仔認識到出名食海鮮o既「好彩」，環境雖然並不出眾，但卻原來燒得一手好乳豬，師傅用材上盛，就連配菜o既麵包及甜品o既雙皮奶都同樣高質美味，實屬驚喜 ！當晚始終係auntie請客，小弟亦不好意思詳問價錢，所以對是否抵食一項，不能作出評論，還望大家見諒。
張貼
