拉麵達人 (已結業)

拉麵本人好鍾意食，但暫時係香港未搵到一間媲美得上日本既拉麵，而佐敦呢間拉麵達人味道上亦唔例外，比唔上日本，但係香港黎講已經算唔錯。不過，古舊且以木為主的環境同店員毫不計較同友善服務就好有日本風味，亦係我欣賞呢間拉麵店既原因之一。 食品方面，叫左一個黑蒜達人，個湯底好夠熱，食完個碗仲有少少餘熱，做得到日本麵店既水準，味道唔錯，唔會好淡，但未稱得上完美，可以再改進一下。朋友叫左個蝦達人，佢就讚口不絕，我自己都試左一啖，湯頭好有蝦既香味，香濃鮮甜，雖然個麵有隻大虎蝦，但個人認為價錢頗高，不過我朋友就話都值得食。服務方面，店員好有禮貌，至少諗返起香港絕大部分既食肆都係用一種黑口黑面既方式招呼客人。而呢間拉麵店既服務就有一種日本人服務精神，有禮而不計較地招呼客人，值得欣賞。食完之後，店員亦會主動問返客人既意見，肯主動了解自己不足既地方再改善，呢個亦係我欣賞既。總括黎講，我希望下次再黎既話，佢地既味道可以再更上一個層次。