一品燒 (已結業)

平時同朋友搵串燒食多數都會去旺角因為夠就腳，今次發現呢間喺旺角長沙街新開嘅一品燒，膽粗粗入去試，估唔到咁有驚喜！平時唔打食評，都要打返篇！首先，講咗海鮮先！呢到啲海鮮燒得好好，嗰條火箭魷魚勁大隻，成條上嗰吓好震撼。唔單止賣相，味道都正！好鮮味！另外，燒黃立倉同芝士燒蠔都好有質素。黃立食外脆內軟又唔會太熟，又係好有鮮味！芝士燒蠔火喉啱啱好，平時少食蠔嘅我都覺得好食！仲有一樣要勁讚嘅係蟶子皇，勁大隻仲要勁新鮮！juicy 又彈牙！加小小蒜蓉吊吊味，仲好食！講完海鮮講吓肉。啲肉類雖然唔及海鮮，但都係好食（只係海鮮太好食）。本人首推牛舌，鹽度適中，唔似一般串燒咁咸。中意羊嘅一定食個蒙古羊架，勁有羊味！（掛住食冇影相）最後，食得串燒梗係要飲啤酒啦。估你唔到嘅係一間咁細嘅鋪頭，竟然係賣生啤1664同埋Hoegaarden！勁有品味囉！3個人食咁多嘢，埋單每人都係百六蚊，有酒飲，超！級！抵！老闆仲畀咗張卡片我，話下次再嚟有八折呀！惟一要彈嘅，我諗係我果枱近門口，啲人出出入入有啲熱囉。我諗下次坐入啲應該好好多，冬天應該勁正！以後同朋友宵夜又有一個好去處，肯定會再幫襯！