新釗記 (已結業)

去完貿易發展局嘅Wine Fair, 本來諗住即刻撘架巴士番元朗，經過新釗記，又俾啲為食蟲搞到囉囉攣！走入去叫左個牛腩撈伊麵HK$53賣相好唔錯喎！牛腩連筋有六七大舊，可惜佢地呢啲都係雪藏牛肋條，咁又真係冇計嘅，新鮮靚牛腩賣到最平都要8-90蚊一斤呀！雪藏牛肋條先講緊卄零蚊磅。牛腩炆得好入味，柱候醬入哂，牛筋好焾滑。到個麵喇，軟硬適中，唔好以為做倒呢個效果好容易，好多時啲淥麵師傅一係淥到的麵發哂脹，一係就生哂骨唔透心，呢度就造到啱啱好喇！呢個麵其實整體好好，唯一小瑕疵係唔係口夠腩汁，所以問左侍應擺左啲蠔油，嘩！好大方，好大碗，夠哂撈麵。總結: 今餐唔錯，諗諗下好似食親新釗記任何一間都冇失望過喎。