吉壽日本料理 (已結業)

吉壽大約係好耐之前一路都係我去開既放題餐廳, 不過有一段時間轉左會, 最近又想試返因為價錢方面真係比較公道。間舖個位置唔算易搵, 不過搵到雅蘭中心呢個地標就好快知道佢係邊度, 所以約人可以先約去果邊先行1分鐘就到。由於時間早左少少，我地未到6點已經入座, 職員都好均真俾返我地個半鐘時間食。首先要讚一樣野係呢度侍應取單係非常快, 當你張單放左檯面上唔夠1分鐘已經過到黎落單。魚生一如既往都非常新鮮之餘上菜都好快, 尤其北海道帶子真係超級大鮮甜。另一個亮點係佢既炸野, 基本上全部都係要必叫既, 因為都係新鮮滾熱辣出現。另外女性朋友都欣賞係佢地既甜品, 作為男仔既我已經投降一半之際, 佢地已經啟動左女人獨有既第二個胃, 非常犀利!遲D好似有夏天優惠, 到時試下先!