南대門韓國料理 (恆港中心)

營業中

休息中

原本想去「秀」食韓國嘢，不過佢大排長龍，唯有轉移陣地去附近嘅韓國菜試吓。見依間都有幾枱客，姑且試試。佢嘅舖面其實比「秀」大，坐得鬆動d。我地睇完一頁紙嘅餐牌，點左兩樣我地認為最穩陣嘅嘢，就係炒年糕同埋泡菜豬肉飯。講唔咸唔淡廣東話嘅阿姐幫我地落單，其實成間舖得一個樓面，佢做晒落單，傳菜，加茶，清枱收錢等，都真係好勁，所以阿姐係零笑容，粗聲粗氣（疑似潮州話）。好多枱都有漏單，冇筷子用等等嘅情況。不過佢上菜速度極快，個年糕好快到，個樣ok. 不過味道真係差，我覺得佢好汁嘅味似港式西餐嘅燒汁多d.仲要唔熱，而且d年糕就林到暈。真係好難煮得咁差。為左唔嘥嘢，我加左好多拌飯醬落d年糕度，如果唔係真係唔想食囉。個泡菜豬肉飯都唔好得幾多，d豬肉同泡菜好似兩樣臨上菜先撈埋咁，泡菜係凍嘅，豬肉就冇泡菜味，其實豬肉係完全冇味，白飯都唔熱，仲差過茶餐廳碟頭飯。我好後悔唔等「秀」，攪到中伏。