今次專登帶屋企人嚟試吓佐敦分店，結果完全冇令我地失望，首先餐廳嘅環境坐得好舒服，空間夠大，而且職員嘅服務態度一流，好親切同埋會同我地介紹一下食物
枱上有好多唔同嘅醬料同埋配料，可以自己調校醬汁
我哋揀咗個藥膳醉雞鍋，因為覺得好養生，可以令火鍋湯底冇咁肥膩，職員會幫我地將切好嘅生雞放去湯底，慢慢熬好就再放其他食物，我哋一開始首先試吓個湯底先，飲得出好濃嘅藥材味，證明真材實料，值得一試
我哋叫咗一份大花甲，食落去好鮮味，好似啱啱喺海上撈上嚟咁，基本上唔使點任何醬料，食佢嘅鮮味已經好足夠
之後一定要介紹同推薦呢款手切安格斯牛，因為牛肉嘅質地好滑，有一種入口即溶嘅感覺，基本上滾幾秒已經食得，而且牛肉味濃郁，牛肉嘅紋理都睇得出好靚，係我最喜愛嘅材料
另外就叫左黑松露豬肉丸併金沙牛丸，呢兩款丸都令我喜出望外，因為佢唔止肉質美味，而且佢裏面仲有驚喜
豬肉丸裏面嘅黑松露味道超級香
，食完成個口都係黑松露嘅味道，而金沙牛丸裏面原來就係鹹蛋黃，其他火鍋店好少食到，好特別
喜歡食肉嘅我哋另外仲叫左份豚肉片，豚肉嘅味道比較清淡，但配上湯底就剛好帶出鮮味，而且豚肉嘅脂肪同肉嘅比例剛好，唔會太肥
最後仲叫咗份日本葛絲，之前應該未試過，原來係類似粗身啲嘅粉絲，但佢嘅質地係比較煙韌有口感，我自己當係麵咁食，佢可以吸晒湯底嘅精華
試過呢間火鍋店真係覺得一分錢一分貨，佢嘅食物質素很高，絕對好過一般火鍋任食店，每一樣都好鮮味好新鮮，而且職員仲會間唔中幫手撥走湯底上嘅油，呢點係好細心，令我真心想讚讚呢間經營得好有心嘅火鍋店
