夢工房西日料理 (已結業)

同朋友2個人想食有生蠔嘅午餐放題，見到呢間有生蠔食就諗住試下。因為我地係OpenRice訂位有85折，但要係午餐放題再加升級刺身先可以使用85折優惠，另外我地再加錢任食生蠔！落單後侍應先同我地講由於琴日係星期日，所以生蠔無哂貨，而且今日生蠔未返貨所以無得食。我唔明白點解入座前唔通知聲，樓面侍應同廚房無溝通好咖咩？無生蠔食都算啦，樓面侍應幾個圍住傾計，叫佢地落單都要叫幾次先聽到。刺身都還可以，而邊爐就真係好普通。我地叫左豬骨湯底，但一啲豬骨味都無，而且其他材料都唔好味。本身對西冷牛扒都抱幾大期望，點知一黎到個下見到只係得失望。埋單前望下張單，先發現好有問題。問侍應張單係咪無問題，佢話係！好彩另一個侍應行過黎睇先發現係有問題。點計個總數都唔啱啦！服務費有$0.8，總數個到又無左？同埋無可能係咁貴！總括而言，好失望好伏。唔會再去食亦唔會推介朋友去食。