螢火

好耐無食鐵板燒啦，趁今日放假，約埋friend食返個午市鐵板燒先~黎到螢火，位於尖沙咀，地方寬敞舒適，座位之間唔會迫。午市套餐都好多選擇，揀左(月)，主打鵝肝多士、汁煮白鱈魚、廣島蠔同美國牛肉，仲有櫻花蝦炒飯、炒野菜等等，夠哂豐富，大滿足！前菜係清新爽脆沙律，醬汁酸酸甜甜好開胃。鵝肝多士多士煎得香脆有咬口，鵝肝煎至表面帶脆，入口細膩綿密，味道香醇。汁煮白鱈魚師傅特意煎到魚皮極級脆口，入口脆卜卜，好厚實。魚肉色澤雪白，食落細膩嫩滑，口感相當鮮嫩，好滋味。廣島蠔煎至兩面金黃色，賣相吸引，肥美飽滿，甘香可口好嫩滑～配以已炒香之櫻花蝦，食落鹹香兼備，有驚喜！美國牛肉(厚燒)肉味濃厚但唔膩，食落肉汁滿溢，細緻又juicy。櫻花蝦炒飯面頭有煎得好靚既太陽蛋，將蛋汁拌勻粒粒分明既炒飯，鮮香十足，配埋香酥櫻花蝦仲正。炒野菜簡單清新，解膩一流。另有漬物同麵豉湯。最後可選甜品或咖啡，有雪糕同雪葩，同好友各選其一，清新香甜，大滿足！