米線二雲南過橋米線 (已結業)

【荃灣區】【米線二】要去馬灣飲宴，約咗朋友變本姐喺荃灣一齊搭車入去，見仲有啲時間就食吓嘢先。喺荃灣廣場對面嗰條食街搵嘢食，見到呢間大大隻字寫住「米線二」有啲日本小店 feel 就有興趣，但係佢係米線舖嚟，好有趣。我睇吓諗都唔諗，就試 $54 嘅「過橋米線」。佢哋嘅米線有芽菜、酸菜、韭菜、肉碎，而過橋米線有埋蟹柳、腐竹、火腿、雞翼尖，配埋唔辣嘅清湯，叫咗少米線，味道都好好。加 $8 飲「凍檸檬茶走甜」，感覺唔錯。而變本姐就試 $33 嘅「自選小鍋米線」，都係唔辣嘅清湯，加 $10 配「墨魚丸」都正。佢加 $8 飲「凍奶茶」都話正，然後都試咗啲小食，先試 $32 嘅「香脆雞球」，外脆內滑，夠晒熱。再試 $28 嘅「豆卜釀豬肉」，好特別，炸得好食。然後試 $19 嘅「郊外油菜」，我哋揀生菜走油配腐乳，係正嘅。到埋單嘅時候，只係 $196，估唔到幾抵喎。。。（地址：荃灣大壩街5-7號仁蕙苑地下3-4號舖）