平時行尖沙咀The One見到一間泰菜都係大排長龍，今次就一於去試一試！大概排左15分鐘就能安排入座。
打開餐牌其實發現每樣野嘅款式價錢都唔算話特別貴（尤其係尖沙咀大商場入邊）。我哋2個人就總數嗌左五樣嘢😗
青咖喱軟殼蟹鍋配法包
相信都係食肆近期推介之選，而家仲做緊推廣價！軟殼蟹係另上保持香脆，配菜有薯仔伴底都煎得香脆好好味😋
青咖喱內配料都豐富，有茄子、大豆等。味道微辣，非常香口惹味！
加埋法包真係不得了！😉
豬肉生菜包
生菜包不嬲都係基本泰菜，肉好juice，辣味都有返咁上下。
把肉碎放上新鮮生菜，再夾埋fresh爆嘅青瓜同豆角，yummy😆
泰式炒椰菜苗
揀得菜苗，當然就係食佢嘅幼嫩啦🤨 泰式炒係微辣，食得出炒嘅時候加咗點酒，非常之香甜！
泰式乾炒豬頸肉河
豬頸肉同菜份量都多，反而河粉嘅量顯得唔係太多😂 但係整體嘅味道非常之香，炒出嚟火喉足！
串燒（3串）
喺出邊食泰式串燒好多時都會燒到又乾又韌，今次呢間有質素三樣嘢都保持juicy。
兩個人叫五樣餸埋單$400，食到捧住個肚走，我覺得價錢同埋食物質素都非常之合理！
——————————
食物質素：8/10
環境衛生：7.5/10
舒適度：7/10
服務：8.5/10
性價比：7/10
總評分：7.6/10
——————————
