湯底方面，我和友人選擇了火鍋撚推介的媽媽滋補老火湯鍋，店員提醒落材料前要先飲下個湯。奶白色嘅湯鋪滿了藥材同鴨血、蜂巢豆腐，飲一啖，果然一鳴驚人，湯身呈現滿滿的人參味，十分好飲。唔係誇張，我同友人都飲咗幾碗先開動。而餐廳嘅鴨血特意整得扁身方便食用又快熟，十分貼心。
材料方面，我哋就叫咗大火鍋撚御用手切肥牛、極品黑豚肉、蟶子皇、流心咸蛋黃豬肉丸、雙併黑松露同香菇貝鮑滑。飲品方面就叫咗冬瓜檸檬茶沙冰。
御用手切肥牛落鍋8秒即食得，牛味十足。
大大大推介極品黑豚肉，入口即化，而且味道極佳！食完想一塊接一塊！
蟶子皇大大條，又係唔洗滾太耐放入鍋中又係8秒就食得。雙併黑松露墨魚滑同香菇貝鮑滑超級超級彈牙！一定要試！我個人就鐘意黑松露墨魚滑多D，松露味超濃郁，食上癮呀～
最後係我最最最鐘意嘅流心咸蛋黃豬肉丸，咬一啖嘅咸蛋黃沙即時流出嚟，對於係咸蛋控嘅我嚟講，真係天堂。
餐廳新開業做緊同鴨血同蜂巢豆腐任加，店員十分熱情，基本上每十分鐘就會過嚟加鴨血、蜂巢豆腐同湯，抵讚。
最後仲有甜品送，係雞蛋腐竹糖水打成嘅沙冰，用秦始皇杯裝住造形超特別。
建議大家可以試下特別啲嘅嘢食，例如蛋牛包心墨魚丸、法式龍蝦湯爆漿牛丸、酒糟五花肉等等，全部都好似好特別但無奈我個肚真係裝唔晒了，真係食到飽一飽，下次再試其它！
