呢度最大特色係有牛三併，肥牛、牛柳粒同牛邊位，片成薄片、厚片、切成方塊，摻埋一齊，口感唔同，一個字，豐富。特別係牛嘅邊位，出面比較少見，有牛味得嚟又有少少𡁻頭，唔似雪花肥牛入口即融，會識得同你排牙有住微妙嘅抵抗力，張住張住咁，過癮，人生最怕就係悶，日日都要食飯，無嘢悶得過日日食埋一樣嘅嘢嘛。
講番打邊爐嘅靈魂──湯底先，呢度個湯底正常，冬陰公有冬陰公味，雖然單調，但都好過加成堆味精入去，食完唔洗瘋狂灌水，怕熱氣叫咗壺洛神花蜜荼，中和番，又幾舒服。不過最後最驚喜嘅係「百花釀油條」，唔知點解間嘢唔嗌油炸鬼而要叫油條，其實就係油炸鬼包蝦滑嘅小食，兩者九唔搭八但又出奇地夾，估你唔到，又幾似人生喎。總結，下次應該會再去。
