影片
食評 (11)
安格斯牛腩撈丁，好得意喎﹗從未見過又未食過安格斯牛腩，肉眼、西冷就食得多。牛腩炆得好軟棉入味，但大舊既就有少少渣囉。連安格斯牛筋都有？哈哈，真定假呀？爽爽滑滑。丁麵無過腍都滿意，西汁份量足夠撈整個麵，只係味道略甜了一點點。整體幾好食，可以試試。梨山骨，咩黎架？新菜色梗係要試啦。起初估係鳳梨，點知職員話其實只係個汁叫做梨山啫，莫非個原創人叫做 Lisa？梨山清甜，配排骨都幾夾。排骨豬味濃，骨少肉多又唔會肥騰騰，夠腍滑有趙口。清炒什菜，又炒得幾好喎。白菜、菜芯、西蘭花混炒夠鑊氣，爽甜多汁，靚菜！楊州炒飯，終於食到個有質數又足料既楊州炒飯喇﹗有叉燒真係差好遠，味道香口好多﹗炒得乾爽夠鑊氣，蛋香非想，落足蛋無搵苯。味道調得剛剛好，好味道 ﹗無生菜絲真好，唔會搞到濕淋淋，不過無蝦仁囉。撈埋個梨山汁，半咸半甜仲食得過癮。咖哩牛腩，咖哩味香濃，味道好鬼似合味道咖哩杯麵，勁得意。不過咖哩汁就濃郁過合味道多倍，而且更加芳香，味道始終離唔開港式茶記咖哩膽，香料組合都差不多。嘩，用上靚牛霖做牛腩喎，鬆化中富彈性又無渣，滾上大量咖哩汁微辣帶甜，滿意滿意。魚香茄子炆伊麵，伊麵煮得非常好，嚥韌富彈性，完完整整無過腍又無斷開。沾滿肉碎咸魚夠香口而微辣，茄子亦棉滑入味，色香味美。倒落大量咖哩汁撈得均勻，捲住軟棉牛腩塞入口。依個組合無與倫比！咖哩魚香炆伊麵，味道精彩絕倫，香辣惹味又黏黏滑滑，美味神奇兼有趣！間間都唔肯煮咖哩牛腩伊麵比我食，好巴閉咩！我咪叫一個魚香茄子炆伊麵、一個咖哩牛腩自己撈囉，哼！搵左幾間都唔肯煮咖哩牛腩伊麵，點解大埔既餐廳變成咁架？早年我係大埔墟苑記都成日 order 淨咖哩牛腩，另外再叫個淨伊麵底撈黎食都得啦，又或者直接 order 咖哩牛腩炆伊啦﹗今次打去昌運苑記話無咖哩牛腩？但係外賣紙上面明明有架喎。現時只搵到上水駿明苑有咖哩炒粉麵，連撈伊都有得食囉。
繼續閱讀
豬扒包X薯仔沙律 $28希望在他結業前食一次 今日終於有幸試到佢既下午茶👄👄 豬扒包身烘至脆卜卜 夾住香煎豬扒,蕃茄片,沙律醬 衝擊我既味蕾👅沙律份量十足推到成座山感 加了青瓜,紅蘿蔔和紅腰豆 顏色更豐富 帶俾你視覺上既享受 食落幾fresh😆 下午茶自由配搭 一款$22 兩款$28 三款$34 自由度十足!! 點了奶油脆豬 雞脾和司華力腸😁😁先講脆豬豬🙆🙆 堅係脆唔會好似有啲茶記感硬掘掘🙊 煉奶牛油雖有罪惡感 但食果陣太好味已忘一切 磅數甚麼的...雞脾皮炸得香口脆卜卜🙋ps小店做多一 兩個月就會執🙈🙈 要食襯早啦!!👣👣
繼續閱讀
「如果~~命運能選擇~~」無錯，命運是唔到我地去選擇。但食D乜，就絕對係由我地自己去選擇！今日下午茶來到『明新焗飯小廚』試一試它的下午茶。近來香港很多茶餐廳、快餐店，因為食材、租金等因素，以往最經濟實惠的下午茶都變得不再「抵食」，而且選擇更愈來愈少。好多時付出了二、三十元，卻完全沒有滿足的感覺。但『明新』可算是比較花心思、動腦筋，懂得做生意的食店。一看下午茶餐牌，最頂的一欄已經立即吸引了我的目光！可以在13款食物入面任選，1款$18，2款$24，3款$30！「有得揀先至係老闆」最先吸引我的當然是「雞脾」啦，下午茶嘆返隻脾，真的是人生一大樂事。但單單一隻雞脾絕對不能夠飽肚，於是將目光投放到一眾麵包多士類，最後決定來一個「厚多士」！多士可以自選醬汁，我點了一個「奶醬多」！人是貪心的動物，我當然不甘心只吃兩款食物，一吃就要吃三款！最後決定了「薯條」！下午茶餐是包熱飲的。三分鐘後，食物送到「奶醬多」、真係好多奶醬。因為夠多醬，所以味道一流，不過多士其實唔算特別厚，而烤得也不夠脆口，整體都算唔錯！「油雞脾」，無搵笨，真係大大隻！啖啖肉，正！不過D汁唔多夠味。只有雞皮有些許味，去到雞肉就比較淡，不過都食得過。「薯條」係我最喜歡的「肥仔薯條」！無咩特別，間間都係咁樣味。不過要注意支茄汁D味怪怪地(唔夠酸)，可因個人口味而唔落。一餐好的下午茶，最後用一杯好的奶茶來畫上完滿句號。食野係要食「色、香、味」。見到個黑色杯忠實咁反襯出奶茶o既淺啡色，真係視覺享受~這裡的奶茶適合喜愛茶澀味的朋友品賞我個人覺得OK!總結：$30 食一個下午茶，唔算貴，又唔算平。但係過程入面有咁多選擇而且食物整體質素中上，所以絕對適合貪吃、又想食一個飽肚下午茶的朋友！
繼續閱讀
星期天與另一半外出食 Lunch. 唔知食咩好, 去咗一直未有機會去的大元村. 美食廣場平台有好多食店, 但另一半見到有門口餐牌有 Laksa, 所以二話不說就入去食. 普通的茶記, 但有好多焗飯同碟頭飯可供選擇. 一坐低就已經送兩碗足料例湯, 是日係 ::青紅蘿蔔煲豬骨::, 好甜好好味. 另一半叫了 ::肥牛 Laksa::, 味道係okay嘅, 但當然唔係好正宗啦, 不過我唔會話佢差, 因為你唔太認真當佢係 Laksa, 佢係一碗有 Laksa 影子嘅湯粉, 味道唔錯. 我就叫咗 ::什肉腸黑椒汁焗飯::. 汁好香好味, 炒飯底亦乾身, 如果個炒底可以再多少少蛋會重香口. 汁嘅份量足夠, 唔使就住就住咁去撈飯. 因為價格合理, 味道唔差, 好過去大X樂比$40幾蚊食焗豬扒飯, 絕對會有下次!! 最重要係好想試埋其他汁~~
繼續閱讀
溫習過後，在大元村附近搵野食。見到美食廣場四個字，咁就不如上去搵下啦。上到樓上，有好多鋪頭都已經關左門，就入左去「明新」試下。一入門口，一位應該係老闆嘅人即刻走左出黎招呼我，帶我到座位坐，仲講左句「向E邊坐吧，有電視睇」。剛坐下去，即刻有人拎左碗湯比我啦。(服務態度真不錯)看看餐牌，就叫左個茄子肉醬焗飯，加杯凍菜蜜。之後，就慢慢品嚐果碗南瓜煲豬骨湯啦。飲落去幾清甜，不過就冇咩南瓜味，似飲豬骨湯多啲。不過飲得出係冇咩落到味精嘅，幾健康，幾好飲。最後，試埋碟茄子肉醬焗飯。一食落口，熱辣辣，發覺啲肉醬真係我前所未試過咁好味，普通茶餐廳可以做到咁嘅味道，真係唔讚都唔得。茄子份量唔算多，細細條，啲肉醬入哂去都幾好味。啲飯就好有咬口，我個人就很喜歡。總括而言，就真係啲醬汁係成碟飯嘅精髓所在。最抵讚嘅係，員工都能保持笑容，而且非常好客。老闆見到有人係門口停低，都會出去招呼人，真係一個好老闆。下次有機會我一定再黎食，茄子肉醬焗飯同你地嘅招待。
繼續閱讀