Cafe Whale

營業中

休息中

本來諗住食漢堡包，但係見到有呢一個別注滷肉飯，仲要係同太安樓嘅一間好正嘅台灣飲料店cross over，梗係要叫嚟試下啦。88蚊，有一碗滷肉飯，飯入面打埋隻溫泉蛋，再加一碗花之丸同魚蛋嘅湯，性價比極高。首先講個滷肉飯啲滷肉，感覺幾新鮮，而且非常香，食嘅時候除咗肉碎之外，仲食到應該係切碎咗嘅豬皮，當然豬嘅脂肪點都有少少嘅，難怪碗飯咁香，配嗰隻溫泉蛋撈雲嚟食超級滋味。至於嗰碗花之丸魚蛋湯配住上，好有台灣便當嘅感覺，而且碗湯畀台灣食到嘅便當嘅湯嚟得大碗，呢一個set果然有料到，應該要配埋嗰間台灣飲料店嘅台式飲料就perfect。

人地又係吐司，呢度又係吐司，不過呢間餐廳的吐司無論係賣相同味道都真係好講究，係食得出嘅誠意料理。呢一份就係呢度No 1銷量嘅吐司︰封門柳黑牛吐司。睇得見D封門柳個芯仲係pink pink地就知好野，D封門柳牛味香濃，夠晒咬口，唔係好多脂肪嗰D部位一咬落去軟淋淋嗰種，如果唔鍾意𡁻野嘅朋友就建議佢地唔好食呢款，都係叫返和牛算數。我自己就比較鍾意封門柳，因為無咁肥，唔會成口油。呢個雞鎚嘅味道都唔錯，叫吐司時加$25轉做餐，就有埋雞鎚同飲品，飲品我在雪櫃揀了紙包裝麥精，正呀喂﹗

終於試得到呢個拎得上手嘅羊腩煲Burger，真係好好食，中間的羊肉漢堡扒都幾Juicy，加埋佢有一塊脆炸枝竹，真係好似食緊枝竹羊腩煲咁樣。Burger可以加$15轉餐，有一份細Size蕃薯條再加飲品，都真係幾抵。另外再叫多一份炸魚薯條，呢度D炸魚都幾特別，有黃立倉、慒仔魚、馬友、沙巴龍躉同埋我揀咗嘅白鱔炸魚薯條，佢呢個炸白鱔做得好好食，咬落去有爆魚油嘅感覺。值得一讚係佢個醬，係乾蒜片再加豆豉醬，好似食蒜蓉豆豉蒸白鱔咁樣。我地最後仲叫多一碗魚湯，因為都係呢間野出名嘅食品，新鮮美味，好似飲緊好多條魚嘅精華。

呢一間cafe嘅魚湯烏冬非常出名就好多人都知道，估唔到佢個立鱗燒雞白湯烏冬竟然都係咁出色好味。立鱗燒照字面嘅解釋就係魚鱗站立，就即係啲魚鱗炸或者燒到一粒粒企晒喺度，兼且連啲魚鱗都可以食埋。近距離抽擊一下立鱗燒嘅魚先，一粒粒喺面嗰啲就係魚鱗，因為呢種魚嘅魚鱗好薄，所以脆咗之後可以直接食埋，一啲都唔洗嘥。個烏冬入面仲有隻溫泉蛋，流心蛋黃係正嘅。至於個雞白湯嘅雞味都幾濃，打咗泡係滑啲嘅。呢個烏冬每日限量10碗，如果鍾意食魚嘅朋友都真係要試試。

去太安樓唔一定要掃街 熱辣辣搵間餐廳坐低食仲可以涼冷氣雖然呢度係出名食fish n chips同封門柳吐司 但嗰日係想食burger嘅心情 就叫咗個最經典嘅<珍寶安格斯牛肉漢堡>漢堡扒外脆內軟夠juicy 仲要打孖上 簡單搭配埋生菜同芝士就已經夠好食 醬汁唔多滿足唔到我想食邪惡嘢嘅心靈<炸雞鎚>都炸得好夠脆 配搭咗bbq sauce細細隻好易食 見佢有好多創意burger都有興趣 仲有用龍躉做嘅fish n chips 一定會再返嚟試

呢一間餐廳的炸魚薯條真係好巴閉，竟然用馬友同龍躉黎做炸魚薯條，令到成件事除了高級晒之外，D味道仲正好多添。首先係用沙巴龍躉做嘅炸魚薯條，呢種不規則形狀嘅魚柳可能就係代表住大廚自己開新鮮魚黎做魚柳，而唔係一般嗰D四四方方嘅魚手指，食落明顯魚味出好多，起晒骨啖啖肉真係好正。至於個馬友炸魚薯條仲以一夜干製作，令到馬友嘅香味更出，佢仲有一個香水樽裝住D花雕酒比你唧，一夜干馬友加埋花雕真係又好味又有創意。另外我都幾欣賞佢個醬，尤其是係外邊綠色圍住嗰隻，原來係用蔥做嘅，掂。

今日幫襯咗呢間太安樓名物，試咗魚湯烏冬同埋漢堡包，兩樣都真係做得好食兼好有heart。獅頭魚魚湯烏冬係原用細細條嘅獅頭魚，起骨後先煎一煎，然後再加入魚湯。因為獅頭魚始終係好細條，所以如果唔先煎一煎，條魚會散晒，而且衣家煎一煎又會令條魚香d。獅頭魚嘅真身，無散開，起咗骨之後啖啖肉。和牛可可漢堡嘅橫切面係咁樣，件和牛漢堡扒都幾厚身，落order時可以叫佢切開一半上，會容易d食，和油油份足而且都幾多汁。加$15轉餐竟然可以揀番薯條，超值。

小店隱藏於太安樓相對人流較少既最後果條巷。 座位唔算多，不過鋪面企理，服務都好有人情味。餐牌上可見各式各樣別出心栽既漢堡。 由較常見嘅和牛，到騸牯牛、三黃鷄、以至枝竹羊、一夜乾馬友都有。 都可算係漢堡介既 fusion。花多眼亂，心大心細之下，揀左枝竹羊漢堡、同花雕一夜乾馬友炸魚薯條。厚厚嘅枝竹羊漢堡，鮮嫩多汁。 配合枝竹腐乳調味，有效咁闢去羊嘅騷味。 平時怕羊騷味嘅人都可以一試。 枝竹唔係平時既濕淋淋，而係整成脆片，保持乾身更加配合漢堡嘅口感。 漢堡用嘅包烤到熱辣辣微脆。 整體嚟講，呢個咁意想不到既中西結合，係估唔到地嘅咁夾。有別於一般嘅炸魚，用一夜干乾馬友，魚肉有一種類似經過風乾熟成既質感，魚嘅鮮味亦都更加濃郁。 配合花雕噴霧，加上一陣淡淡嘅酒香。 而外皮就炸到金黃香脆。 又一成功 fusion。餐牌上仲有太多有趣東西想試。 一次食唔晒，下次再嚟。

星期六下晝喺西灣河呢一間Cafe過咗一個非常熱氣嘅下午，因為叫咗幾樣炸嘢食，樣樣都幾好食喎。第一碟熱氣嘢係吉列炸蠔，一份有五粒，炸蠔嘅外層粉漿都幾薄，雖然係雪藏蠔，但係啲蠔都幾肥美，碟嘅沙律菜都好新鮮，都幾有誠意。跟住嗰兩樣熱氣嘢都係炸薯條，左邊嗰款係麻辣薯條，右邊嗰款係火炙明太子薯條，以邪惡嚟講，一定係火炙明太子比較邪惡，而佢嘅味道亦都相對出眾。至於個麻辣薯條係堅麻辣嘅，配啤酒就無敵，如果唔食得辣嘅都幾係嘢。

今天食Burger做Lunch，試咗一個都幾特別嘅雞扒漢堡，就以下呢個嘞。余均益辣椒醬雞扒漢堡，塊雞扒好大晒，外皮炸都好脆，所以好香口，雖然落咗辣椒醬，但係又唔係真係好辣，不過佢用余均益辣椒醬，又真係令人嘅童年回憶返晒嚟。食burger點可以冇薯條同汽水呢？所以我就加咗$45轉成餐，可以揀一個特色薯條同埋一個雪櫃入面嘅飲品，雖然有紙包檸檬茶嗰啲，不過我覺得食burger都係應該飲可樂嘅。至於個特色薯條就揀咗香辣薯條，唔算好辣，啲薯條好新鮮好好食。

用和牛去做burger唔係第一次食，不過burger個包用朱古力包就係第一次試，用和牛嚟做漢堡扒，有分會比較高，估唔到配朱古力包嘅味道都唔錯，個朱古力包甜甜地加埋和牛嘅油分食嘅時候你又唔會覺得好油膩好滯。和牛可可漢堡叫佢出餐嘅時候切開一半，食嘅時候容易啲，因為佢呢度嘅burger都幾大個，一啖咬唔曬，如果唔切開一半，食嘅時候真係有啲複雜。佢burger入面啲沙律菜都幾新鮮同埋都幾多。加45蚊要埋個特色薯條同飲品，美好的一餐。

聽講Cafe Whale專出一D新奇有趣嘅Burger，就以魚柳包為例，佢地唔會甘心用普普通通嘅魚柳黎整，反而用咗相對比較外間少見嘅龍躉開魚柳黎做，除了高成本D之外，備料功夫亦都多D，真係一個有姿勢又有實際嘅Burger。龍躉魚析一D都無將價就貨，食落去係幾厚身，炸魚嘅粉漿好薄，一啖咬落去啖啖魚肉，食嘅時候不單止無雪藏味，而且仲食得出魚嘅鮮味，佢個秘製醬汁唔係一般嘅沙律醬千島醬，好似叫蔥油他他醬，綠綠地色，估計就係D蔥嘅顏色，美味度極高。加碼跟餐叫多份特色香辣薯條，薯條係即叫即炸嘅，雖然叫香辣但係其實又唔會好辣，跟餐有一個罐裝或紙包裝飲品。

封門柳黑牛吐司，睇落去好似唔係好大份，實情就係超級飽肚，我覺得比漢堡包更飽肚，不過切開咗方便兩個人share。選用竹炭吐司令到呢個菜式顏值加分。封門柳牛肉味濃，加上條條牛肉都呈現紅紅地色，生熟度掌握得唔錯，無血水但係夠嫩。加錢轉特色薯條餐，而特色薯條就選擇咗呢個火炙明太子薯條，呢個薯條真係有啲料到，第一次食到呢個配搭，喺幾款特色薯條之中呢個性價比最高。跟餐飲品就可以喺雪櫃任揀，除咗一般嘅汽水之外，竟然有紙包裝烏龍茶或者茉莉花茶，健康啲嘅選擇。

嚟呢間西灣河太安樓第三街嘅cafe除咗要食漢堡包之外，其實魚湯烏冬係仲有炸魚薯條系列都係一樣咁精彩，所以今日就冇食漢堡包，反而叫咗一個魚湯烏冬同埋一份炸魚薯條。魚湯烏冬有四款，我就揀咗最基本嘅魚蛋魚片魚湯烏冬，$76一份，除咗個魚湯烏冬之外仲有一份小食同埋飲品，小食成日都唔同嘅，最常見嘅就係話梅浸蕃茄仔，不過今次就有呢個醃蘿蔔，另外傳說中做緊一個麻辣魚扣。魚湯烏冬最精彩嘅部分就係個魚湯，飲落去就知道真材實料用新鮮魚淆製，真係唔好嘥嘢個湯一滴都唔會淨返。至於炸魚薯條就要咗炸魚仲，薯條仲可以唔使加錢轉做番薯條，認真貼心。

📍Cafe Whale (西灣河)西灣河筲箕灣道57-87號太安樓第三街A61 A&B號舖在西灣河太安樓裡的一條街角，藏著一家低調卻令人驚喜的餐廳——Cafe Whale。一推開門，迎面而來的是一股溫暖的氛圍，每一處細節都流露出店主的個人品味與熱愛。無論是傳統的和風布簾，還是櫃子上擺放的收藏品和動漫角色模型，每一件物品都訴說著店主的故事。讓人彷彿進入了一個溫馨又獨特的小世界，既有日式的典雅，又帶著個性化的溫度與巧思。推薦 - 秘製鮮魚仔湯烏冬鮮的魚湯作為基底，融入秘製湯料，湯頭鮮甜而富有層次。滑溜的烏冬吸收湯汁的精華，每一口都讓人感受到海洋的鮮味與湯料的獨特風味。魚蛋爽滑彈牙，每一口都帶著鮮美的魚香，讓人回味無窮。湯底的濃郁程度恰到好處，不會過於厚重，反而有一種清新的鮮甜感。 推薦 - 吉列炸蠔 (5隻) 其外層裹上金黃酥脆的麵包糠，輕輕咬下去便能聽到令人滿足的咬碎聲。裡面的蠔肉嫩滑多汁，保持了蠔的鮮甜原味，既不過於油膩，又恰到好處地展現了海洋的風味。這種外酥內嫩的口感，讓人一口接一口欲罷不能。 龍鳳薯條（薯條+蕃薯條）傳統的薯條和香甜細膩的蕃薯條，呈現在木製托盤上，充滿自然的