616牛肉火鍋專門店 (翠怡花園)

營業中

休息中

喺人都知打邊爐仲要食牛價錢真係唔會平得去邊,估唔到呢個嘢堅有良心話說我同老公見佢都開咗一段時間又未試話,所以就抱住豪駛一餐嗰日已經好夜都成10點,喺門口望入去得番3枱,好企理坐低後服務員就循例介紹吓,見到一個全牛套餐只賣338 ,(已包括菜,2罐飲品同醬料) 我見2個人應該都食得哂又可以試吓唔同部位就叫咗一個,跟住仲叫咗一個限量嘅部位叫封柳門都只賣48！嘩~如果出面啲鋪頭限量出售仲唔過百呀！所以稔都唔稔就叫咗！嚟咗之後湯底得一種就係牛骨湯,不過坦白我又唔覺得好味唔夠朱骨湯濃個套餐嚟咗見到好有心思,就係攞隻牛樣出嚟唔同部位擺唔同位置,等你知道食梗咩位 ! 幾好 ! 最後埋單只係400 蚊有找2位 ( 唔知點解88折 ) 其實我地仲額外叫咗2碟响鈴同一碟菜,抵到無朋友 ! 絕對有下一次

有得book位無限時很好。清清的湯有蘿蔔同粟米。牛肉同其他野都係app落單，但隻app 廢廢地，performance差，有crash，搞到我地揀唔到限定既牛肉。如果要QA可以留言聯絡。無錯啲牛肉有限量款，每枱只可以叫2碟，所以我地唯有係有限(crash左之後又少左2款) 既限量款揀，咩部位唔記得但係好食啲既。比較多雪花既應該係限量，每一種肉都食到唔同肉質，有驚喜。響零脆到呢，係咪附近樹記入貨，好新鮮。菜都多起碼唔係幾塊。枱面有張野教6幾耐，但已經唔記得邊度打邊度。一碟牛48，菜18，女仔食係抵過任食既，質素又唔錯。

朋友生日飯局入到老遠的大埔區打邊爐，全因主角係一個"大滾友"，無時無該日而繼夜夜而繼日都係掛住滾。生日飯都當然無獨有偶一齊滾。人生唔不熟，都花了一點功夫先搵到。雖然一早訂了位，但人客實在太多都等了一段時間先可以入座。相反，附近的食肆都生意淡薄，形成強烈對比。全牛火鍋當然有理無理叫一個round黎試下啦，上枱都聽唔切店員嘅介紹，估估下依碟係咩，果碟係咩。有d人攞住部點菜tablet睇圖尋肉，我就二話不說是但夾塊淥黎食啦個人認為胸口膀(全白果碟)係最突出，爽中帶油香正到暈ps. 可能係要控制在48一碟原故，所以d肉相對薄左少少，有些食唔出有咩味，如果可以厚返少少就最好啦

果日朋友16:30到, 未滿座, 不過要過半數才可入座, 無限時, 侍應個個都好有禮貌, 只得一種湯底, 就係牛骨清湯, 真係好清架 ! 可能因為想客人食到每一款既牛味, 所以特登咁清掛 !然後點左幾款牛, 呢日 "吊龍"+"牛心腚"+"吊龍伴" 都無貨, 我地點左 "皇帝菜+白蘿蔔+牛朴肉+金花趾+匙肉+胸口膀+封門柳+牛腩心+挽手腩+牛骨髓+粟米", 一落單後, 就會有個流斗放向你面前, 如20分鐘內未到齊, 未到果碟會免費, 結果係未夠鐘, 都好快手咁上哂黎啦!原本張單合共 $476, 到埋單時, 原來醬料每位成為$10, 無加一服務費, 都算 ok 架啦 ! 每個牛既部位, 都好新鮮, 不過4個人食完, 都係唔飽架 ! 所以最後轉移陣地再食過 ! 呢間可以一試既 !

聽好多人講好正咁 所以排隊都要等可能開張無耐 所以服務態度都幾好落左單之後仲有個漏斗仔保證時限內送上食物 都幾誠意湯底得一種 牛骨湯 入面就係一大舊牛骨同幾片白蘿蔔好淡口諗住都無所謂 之後係食牛既原味但。。。原來我錯了 無醬汁係無咩味既睇個樣 d牛係幾靚架碟碟48叫左3款黎試其實已經唔記得哂咩部位啦因爲d名好少見嘛 淨係記得有匙肉 都係果句啦 無豉油同蒜就唔好味囉因為個湯底真係淡到水咁牛肉就正常啦 可能我期望太高未試過可以試一次因為好多款未聽過既牛部位架

第一次來到。店面光猛企理。由於我23:00先來到，大量特別牛肉已經賣清，証明應該有數量限制，保証新鮮。最後點了，還有數量不多的牛朴肉（牛脛脊），黑百葉，胸口膀（牛胸油），及皇帝菜。由於主要食牛肉，所以不考慮其他。所有肉一上碟都好有光澤。味道最水準，重點係-只係$48一碟。由於太好食。已經叫到第三碟牛朴肉，不過我看到第三碟都是肥肉，我馬上跟店員反映。佢地都好積極，馬上送一碟新既比我。所以整體味道質量高，服務好，重要係食左十碟牛肉都係$500左右。比好多大公司實惠好多。絕對值得一試👍👍👍

見Facebook有bloger介紹呢間新開專食牛肉既火鍋，成家牛魔皇就趁佢有開張期肉7折去試，見佢碟碟都係$48，都算係幾抵食，因為怕人多，我地6點就去，去到已經有幾枱客人，湯底只有一款牛骨清湯，味道好清，有幾件粟米同白蘿蔔。點菜後，有個侍應就黎話比我地知，已經入左單，仲拎左個沙漏放低，話如果第一次落單既食物，邊一碟係沙漏漏哂前未到(大概20分鐘)，就唔收錢，咁食物都全部好快到，另外有自助醬料區，有一般火鍋醬料蒜蓉、辣椒、䓤、沙茶醬等等。牛肉全部都非常新鮮，我自已就鍾意匙肉同牛朴肉，家人就鍾意挽手腩同金花趾，其實睇樣有幾款都好似，有啲滑、有啲肉味重、有啲爽口，絕對可以款款都試吓。絕括一句，鍾意食牛肉既，必定唔會望，價錢確實好經濟，與其比二百蚊去任食火鍋，我就寧願呢度食靚牛肉，價錢都唔會貴好多。